ABŞ ordusu İranı yenidən bombaladı - 90 hədəfə zərbə
Ölkə.az xəbər verir ki, bu barədə Birləşmiş Ştatlar Silahlı Qüvvələrinin Mərkəzi Komandanlığı (CENTCOM) məlumat yayıb.
“CENTCOM qüvvələri İrana qarşı Hörmüz boğazında ticarət gəmilərinə və günahsız mülki dənizçilərə hücum etmək imkanlarını daha da zəiflərmək məqsədilə əlavə zərbələr endirib. ABŞ qüvvələri İranın təxminən 90 hərbi hədəfinə zərbə endirib”, - məlumatda bildirilib.
Qeyd olunub ki, zərbələrin endirildiyi hədəflər arasında hava hücumundan müdafiə sistemləri, sahil müşahidə sistemləri, raket və dron saxlama yerləri olub.
Məlumata görə, ABŞ ordusu İran İslam İnqilabı Keşikçiləri Korpusuna (SEPAH) məxsus 60-dan çox kiçik qayığa da zərbə endirib. Bununla da Hörmüz boğazından keçən üç ticarət gəmisinə hücum edərək atəşkəsi pozan İrana ciddi ziyan vurub.
SEPAH isə bəyan edib ki, Vaşinqtonun təcavüzü davam edərsə, bölgədəki ABŞ bazalarına zərbələri genişləndirəcəklər.
“İran İslam İnqilabı Keşikçiləri Korpusu Amerika ordusuna xəbərdarlıq edir ki, təcavüz təkrarlanarsa, sarsıdıcı cavab tədbirlərimiz regiondakı digər Amerika bazalarına da şamil ediləcək”, - SEPAH-ın “Telegram” kanalında qeyd olunub.
Bildirilib ki, cavab əməliyyatı zamanı Küveyt və Bəhreyndəki ABŞ bazalarının infrastrukturuna və obyektlərinə zərbələr endirilib.
Mürtəza
