Turistlər bu ölkədə istidən ölürlər
Ölkə.az xəbər verir ki, bu, isti hava dalğasının başlanğıcından bəri ekstremal hava şəraiti ilə əlaqəli dördüncü təsdiqlənmiş ölüm hadisəsidir.
Əndəlusiyanın cənub muxtar icmasının regional səhiyyə şöbəsinin məlumatına görə, 59 yaşlı qadın uzun müddət ekstremal istiyə məruz qaldıqdan sonra ölüb.
Rəsmilərin məlumatına görə, mərhum Rusiyada anadan olub və 2014-cü ildən Sevilyada yaşayıb. Onun ölümünə uzun müddət yüksək temperatura məruz qaldıqdan sonra baş verən isti vurması səbəb olub.
Lakin qadının bu cür halların ehtimalını artıran heç bir məlum risk faktoru olmayıb. Onun uzun müddət istiyə məruz qalmasının səbəbləri hələ müəyyən edilməyib.
Bu, Sevilyada son günlərdə istidən ikinci ölüm hadisəsidir. Bir neçə gün əvvəl şəhərdə 48 yaşlı kişi açıq havada işləyərkən huşunu itirərək ölüb.
Mayın 15-də Əndəlusiyada xüsusi istidən qorunma protokolunun tətbiq olunduğu yüksək temperatur mövsümünün başlanğıcından bəri istidən ölənlərin sayının dördə çatdığı təsdiqlənib. Bundan əvvəl Sanlukar-la- Mayor bələdiyyəsində 71 yaşlı qadın və Almeriya əyalətində 68 yaşlı kişi də istidən ölüblər.
Regional Səhiyyə Nazirliyinin məlumatına görə, protokol qüvvəyə mindikdən bəri 1081 nəfər istidən qaynaqlanan xəstəliklər səbəbindən tibbi yardıma ehtiyac duyub. Onlardan 18 nəfərinə isti vurma diaqnozu qoyulub və hamısı xəstəxanaya yerləşdirilib. Bu xəstələrdən dördü ölüb, on nəfər isə hələ də xəstəxanalarda müalicə alır.
Əndəlüs hakimiyyəti sakinləri və turistləri ən isti saatlarda uzun müddət günəş altında qalmaqdan çəkinməyə, müntəzəm olaraq su içməyə və həddindən artıq istidə ən həssas olan yaşlılara, uşaqlara və xroniki xəstəlikləri olan insanlara xüsusi diqqət yetirməyə çağırır.(lent.az)
