Tanınmış aparıcının evindən oğurluq edən qadının məhkəməsi başladı

Ötən ilin dekabr ayında tanınmış aparıcı Mehparə Quliyevanın evindən oğurluq edən qadının məhkəməsi başlayıb.

“Ölkə.Az”ın məlumatına görə, cinayət məcəlləsinin 177.2.4-cü (oğurluq) maddəsi ilə təqsirli bilinən Zurabova Ofeliya Vidadi qızının məhkəmə prosesinə hakim Vusal Qurbanov sədrlik edir.

İttiham aktına görə, 2017-ci ilin dekabr ayının 18-də Daxili İşlər Nazirliyinin (DİN) “102” Zəng Mərkəzi Xidmətinə Nərimanov rayonu ərazisindəki mənzillərin birindən oğurluq edilməsi barədə müraciət daxil olub.

Faktla əlaqədar Nərimanov RPİ 18-ci Polis Bölməsinin əməkdaşları həmin ünvana gələrək müvafiq tədbirlər həyata keçiriblər.

Araşdırmalarla mənzildən 11000 manat dəyərində qızıl-zinət və kosmetik əşyaların oğurlanması müəyyən edilib.

Keçirilən tədbirlərlə həmin evdə qulluqçu kimi işləyən qadın şübhəli bilinərək saxlanılıb.

İstintaqa təhvil verilən Bakı şəhər sakini Ofeliya Zurabova törətdiyi əməli etiraf edib. Onun oğurladığı qızıl-zinət əşyalarının bir hissəsini satdığı, bir hissəsini isə lombardlara verdiyi müəyyən edilib.

Qeyd edək ki, cinayət işində zərərəçəkmiş kimi tanınan, uzun illər İctimai Televiziya və Radio Yayımlar Şirkətində aparıcı kimi işləyən Mehparə Quliyevadır.