Cavid Qurbanovun bankının vəzifəli şəxsləri məhkəmə qarşısında
“Ölkə.Az”ın xəbərinə görə, cinayət məcəlləsinin 179.3.2-ci (küllü miqdarda mənimsəmə) maddəsi ilə təqsirli bilinən şəxslərin məhkəmə prosesinə hakim Dadaş İmanov sədrlik edir.
İttiham aktına görə, “Gəncəbank” ASC-nin 4 vəzifəli şəxsi tərəfindən vurulmuş 14 mln. manatdan artıq maddi ziyanın 421 min manatdan çoxunun ödənilməsi təmin edilib və onların ümumi dəyəri 13 mln. manatdan çox olan əmlakı üzərində həbs qoyulub.
Qeyd edək ki, 1 saylı Bakı İnzibati-İqtisadi Məhkəməsinin 15 fevral 2016-cı il tarixli qərarı ilə "Gəncəbank" ASC müflis elan edilib.
Müflis elan olunan “Gəncəbank”ın “Azərbaycan Dəmir Yolları” QSC-nin sədri Cavid Qurbanova məxsus olması ilə bağlı faktlar da var. Belə ki, C.Qurbanovun atası Qənbər Qənbərov bankın müşahidə şurasının üzvü olub. Bankın saytında Q.Qurbanovun 18,66 faiz paya malik olması da göstərilib. Bundan başqa saytdan bəlli olur ki, Q.Qurbanovun daxili telefonu müşahidə şurası sədrinin daxili nömrəsi ilə eynidir - 102. Bu məlumatdan belə nəticə çıxır ki, “Gəncəbank”ın Müşhahidə Şurasının sədri Pərvanə Novruzova ilə Qənbər Qurbanov eyni kabineti bölüşüblər.
Həmçinin 2015-ci ilin oktyabr ayında “Gəncəbank” Müşahidə Şurasının sədri Pərvanə Novruzovanın və Kəlbəcər Rayon Prokurorluğunda işləmiş qardaşı olan Məhəmmədli Novruzovun Daşkəsən rayonu Xoşbulaq kəndində yerləşən evləri qarət edilib. Oğurluq həmin şəxslərin yaxın qohumları tərəfindən törədilib.
Belə ki, Daşkəsən rayon Polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törədən Gəncə sakinləri - 26 yaşlı Emin və 22 yaşlı Sultan Əliyev qardaşları, eləcə də onların yaxın dostu 33 yaşlı Ürfan Məhərrəmov saxlanılıb.
Onlar dayı və xalalarının evindən seyf, müxtəlif markalı televizorlar, DVD-lər, eləcə də xeyli miqdarda qiymətli məişət əşyaları oğurlayıblar.
İttiham aktına görə, Əliyev Emin Mobil oğlu, Əliyev Sultan Mobil oğlu və onların tanışları Məhərrəmov Ürfan Nürəddin oğlu qabaqcadan əlbir olub bir qrup təşkil edərək 21 sentyabr 2015-ci il tarixində Əli Novruzovun yaşadığı mənzilə daxil olublar və yuxarıda qeyd edilən ev əşyalarını oğurlayıblar.
Daha sonra dəstə üzvüləri 9 oktyabr 2015 ci il tarixində Pərvanə Novruzovanın evinə girərək oradan məişət əşyalarını gizli yolla talayıblar.
Saxlanılan hər üç şəxs Novruzovların evindən oğurluq etdiklərini etiraf ediblər.
