Qaraçuxur məscidini yandıran PKK-çıların məhkəməsi başlayır

Bakı Ağır Cinayətlər Məhkəməsində Azərbaycan vətəndaşları Namiq Nəsibov və Elnur Ələkbərovun CM-nin 214.2.1-ci (terrorçuluq, qabaqcadan əlbir olan bir qrup şəxs tərəfindən törədildikdə), 214.2.3 (terrorçuluq, odlu silahdan istifadə etməklə törədildikdə), 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, döyüş sursatı, partlayıcı maddələr və qurğular əldə etmə, satma, daşıma və gəzdirmə) və 134-cü (öldürməklə və ya sağlamlığa ağır zərər vurmaqla hədələmə) maddələri ilə təqsirləndirilmələrinə dair məhkəmə prosesi başlayır. 

Ölkə.Az xəbər verir ki, ötən il noyabrın 26-da saat 2 radələrində Suraxanı rayonu, Qaraçuxur qəsəbəsi, Ə.Mehbalıyev küçəsi, 58-də yerləşən “Cümə” məscidinə yandırıcı maye ilə doldurulmuş şüşələr atılmaqla orada yanğın törədilib.

Hadisə yerinə Suraxanı RPİ və 32-ci polis bölməsinin əməkdaşları cəlb olunublar, faktla bağlı RPİ istintaq şöbəsində CM-nin 134-cü maddəsi ilə cinayət işi başlanıb. Baş vermiş cinayət hadisəsində terrorçuluq əlamətləri müəyyən edildiyindən istintaqın davam etdirilməsi Milli Təhlükəsizlik Nazirliyinin (MTN) İstintaq Baş İdarəsinə həvalə olunub.

Keçirilən anti-terror tədbirləri nəticəsində Binəqədi rayonunun Biləcəri qəsəbəsində Namiq Nəsibov və Elnur Ələkbərov noyabrın 28-də saxlanılıblar. Nəsibovun üzərindən “Makarov” tipli tapança və 8 ədəd patron, Elnur Ələkbərovdan “Smit-Vesson” markalı revolver aşkar edilib. 

İstintaqla müəyyən edilib ki, Namiq Nəsibov 2014-cü ilin avqust-sentyabr aylarında “PKK” terrorçu təşkilatının nəzarətində olan Suriya Ərəb Respublikasının ərazilərinə gedərək oradakı döyüşlərdə iştirak edib. Namiq Nəsibov Suriyanın Kobani şəhərindən qayıtdıqdan sonra Elnur Ələkbərov ilə birgə “PKK” terrorçu təşkilatının respublikamızda qanadı olaraq qeyri-rəsmi “Yekbun” təşkilatını yaradıblar. Ətraflarına tərəfdarlar toplamaq işinə başlayan Namiq və Elnur internetdə sosial şəbəkələr vasitəsi ilə yaratdıqları təşkilatın adından Bakı şəhərində aksiyaların keçirilməsi üçün müxtəlif çağırışlar ediblər. 

Bundan başqa, Nəsibov və Ələkbərov islam dininin “əhli-sünnə” təriqətinə mənsub və dini baxışlarına görə radikal saydıqları şəxslərə qarşı olan nifrətlərini nümayişkaranə şəkildə ifadə etmək, onların arasında qorxu və vahimə yaratmaq məqsədilə, bu cür qəbul etdikləri şəxslərin kütləvi toplaşdığı yerlərdə terrorçuluq aksiyasının törədilməsini planlaşdırıblar.

Bu niyyətlərinin həyata keçirilməsi məqsədilə 2014-cü il noyabrın 25-də axşam saatlarında Namiq Nəsibov və Elnur Ələkbərov izlənməkdən ehtiyat edərək bir neçə taksi dəyişməklə Qaraçuxur qəsəbəsinə gəlib, buradakı“Cümə” məscidində yanğın törətmək məqsədilə ərazidə yerləşən müxtəlif yanacaqdoldurma məntəqələrindən 10 litr benzin alıblar və həmin oddan təhlükəli mayeni əvvəlcədən əldə etdikləri şüşə butulkalara dolduraraq yandırıcı və partlayıcı vasitə hazırlayıblar. Təqsirləndirilən şəxslər noyabrın 26-sı gecə saat 2 radələrində həmin məscidin qapılarını sındırıblar, sonra isə yandırıcı maye ilə dolu şüşələriın fitillərini alışdırıb, içəriyə atmaqla orada yanğın törədiblər və hadisə yerindən taksi ilə uzaqlaşıblar. 

Hazırlıq iclası iyunun 10-na təyin olunub.

Ölkə.Az