Emil Hüseynovun qətlinin istintaqı başa çatır

Yekaterinburqda Himmaşda baş verən dava zamanı 28 yaşlı futbolçu Emil Hüseynov qətlə yetirilib, bu cinayət üzrə istintaqın əsas hissəsi həyata keçirilib.

Ölkə.Az xəbər verir ki, bu barədə “URA.Ru”ya Rusiya Federasiyası İstintaq Komitəsinin Sverdlovsk üzrə İİ-dən bildiriblər. Orada dəqiqləşdiriblər ki, təxminən bir ay sonra istintaq başa çatacaq.     

İstintaqın versiyasına görə, qətli törətməkdə ittiham edilən MMA (Mixed Martial Arts) güləşçisi Tiqran Çiçakyan və 28 yaşlı zərərçəkən arasında mübahisə aprelin 19-da Alpinistlər küçəsində yerləşən “U Saşi” kafesində baş verib. İK-da dəqiqləşdirilib ki, onlar əvvəlcədən tanış olmayıblar, hər kəs gəldiyi öz tanışları ilə istirahət edirmiş. “Cinayətkar biçaqla silahlanaraq, öz rəqibini sinəsindən yaralayıb. Aldığı yaralardan zərərçəkən dünyasını dəyişib”, - baş verənlər barədə istintaq öz versiyasını səsləndirib.  

Onların versiyasına görə, mübahisə məişət xarakterli olub və “içkili vəziyyətdə şəxsi düşmənçilik zəminində” baş verib. “Cinayətin bir qrup şəxs tərəfindən törədildiyinə dair heç bir obyektiv dəlil yoxdur”, - İK-dan bildiriblər. Amma Azərbaycanın Yekaterinburqdakı baş konsulluğunda mübahisənin millətlərarası münaqişə əsasında baş verdiyini hesab edirlər.

Qeyd etmək lazımdır ki, “U Saşi” kafesi bu yaxınlarda adını dəyişib. İndi bu kafenin adı “Milana”dır.

Ölkə.Az