Nərimanovda arvadının başını kəsən metro işçisinin məhkəməsi başladı
Bu il yanvarın 25-də Nərimanov rayonu, Aşıq Qərib küçəsindəki 69 saylı evdə İlham Süleymanov qısqanclıq zəminində həyat yoldaşı Məhəbbət Süleymanovaya (1979-cu il təv.) boğaz nahiyəsindən çoxsaylı bıçaq zərbələri endirərək, onu qətlə yetirib və hadisədən sonra Nərimanov RPİ-nə könüllü gələrək təslim olub.
O, cinayəti namus üstündə törətdiyini bildirib. Onun Bakı Metropolitenində elektrik-mexanik işlədiyi məlum olub. Hadisə yerinin müayinəsi aparılandan sonra meyit morqa göndərilib, iş üzrə təyin olunan məhkəmə-tibbi ekspertizasının rəyinə görə, qadının ölümünə boğaz nahiyəsinin kəsilmiş yarasından irəli gələn kəskin qanitirmə səbəb olub.
İstintaq zamanı şahid qismində dindirilən tutulan şəxsin valideynləri cinayətin namus üstündə törədildiyini təsdiq ediblər. Sona Süleymanova oğlunun 18 ildir dözdüyünü, aralarında dəfələrlə mübahisələr olsa da, sonda barışdıqlarını, sonuncu dəfə Məhəbbətin acıq edərək, 10 gündən artıq öz atasının evində yaşadığını, sonra isə geri qayıtdığını bildirib. Hətta İlham arvadının istəyini yerinə yetirərək ona “Hyundai” markalı avtomobil də alaraq, hədiyyə edib. Bununla yanaşı, Məhəbbətin evə gediş-gəlişini izləmək üçün evin otaqlarına müşahidə kameraları yerləşdirib.
İlk məhkəmə iclasında ifadə verən İlham Süleymanov ittiham üzrə özünü qismən təqsirli hesab edib. Zərərçəkən Nəriman Məsimov qızının uşaqlarının onlarla birgə yaşadığını bildirib, o Məhəbbətin idarə etdiyi avtomobilin onlara qaytarılmasını və təqsirləndirilən şəxsə ağır cəza təyin olunmasını tələb edib. Sonra zərərçəkənlə təqsirləndirilən şəxsin ailə üzvləri arasında qarşıdurma baş verib, lakin məhkəmə nəzarətçiləri onları sakitləşdiriblər.
Elan olunan fasilədən sonra proses qeyri-müəyyən müddətə təxirə salınıb.oxu.az
