Gömrük əməkdaşına narkotik satmaq istəyən şəxslər cəzalandırıldılar
Bakı Ağır Cinayətlər Məhkəməsində Saleh Nəcəfov və Seymur Abbasovun CM-nin 206.3.2 (qaçaqmalçılıq, qabaqcadan əlbir olan bir qrup şəxs tərəfindən törədildikdə), 234.4.1 (qabaqcadan əlbir olan bir qrup şəxs tərəfindən satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama), 234.4.3 (satış məqsədi ilə qanunsuz olaraq narkotik vasitələri və ya psixotrop maddələri külli miqdarda əldə etmə və ya saxlama) və 318.2-ci (qabaqcadan əlbir olan bir qrup şəxs tərəfindən dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənar keçmə) maddələri ilə təqsirləndirilmələrinə dair cinayət işi üzrə məhkəmə prosesinin baxışı yekunlaşıb.
Ötən il iyunun 10-da Biləsuvar Gömrük İdarəsinin əməkdaşlarının keçirdikləri əməliyyat tədbirləri nəticəsində Bakı-Astara magistral yolunun 60-cı kilometrliyində Ələt qəsəbəsini göstərən yol nişanının yaxınlığında Saleh Nəcəfov və Seymur Abbasov 895 qram heroini şərti alıcı kimi çıxış edən gömrük əməkdaşına satarkən yaxalanıblar. İstintaq-əməliyyat tədbirləri davam etdirilərkən tutulan şəxslərin “Sədərək” ticarət mərkəzinin yaxınlığındakı dərəyə atdıqları iki kisədə 1 kiloqram 465 qram marixuana və bir sellofan kəsiyində 82,337 qram heroin aşkar edilərək götürülüb.
Məhkəmənin hökmü ilə Seymur Abbasov 10 il, Saleh Nəcəfov 9 il müddətinə azadlıqdan məhrumetmə cəzasına məhkum olunublar. (oxu.az)
Ölkə.Az
