Liseydən ölən şagirdlə bağlı təsirli paylaşım: "15 yaşına baxmayaraq..."
Bakı Avropa Liseyinin 9-cu sinif şagirdi Cavad Quliyev vəfat edib.
Ölkə.az-ın xəbərinə görə, bu barədə lisey məlumat yayıb:
"Dərin hüznlə əziz və sevimli şagirdimiz, liseyin 9r2 sinfinin nümunəvi şagirdi Cavad Quliyevin qəfil vəfatı xəbəri ilə paylaşırıq. Həyatının bu qədər erkən və gözlənilmədən sona çatması, arzuların yarımçıq qalması hamımız üçün ağır və kədərlidir. Balamızın acı itkisi lisey ailəmizin hər bir üzvünü sarsıtdı, Cavadı tanıyanların qəlbində sağalmaz bir yara açdı.
O, həmişə mehribanlığı, səmimiyyəti, fədakarlığı ilə seçilərək hər kəsin, xüsusilə də onu sonsuz sevən sinif yoldaşlarının qəlbində xüsusi yer qazanmışdır. 15 yaşına baxmayaraq, o, dünyaya baxışına, dostlarına isti münasibəti, müəllimlərinə qarşı böyük hörməti, hər kəsin problemini həll etmək istəyinə görə dəyərli idi. Bizim üçün Cavad haqqında keçmiş zamanda danışmaq çox ağırdır.
O, qəlbimizdə ətrafa sevinc bəxş edən, nur saçan, istisinə həmyaşıdlarını toplayan, adi bir təbəssümü ilə könüllərin xoş hisslərini oyadan əzizimiz, doğmamız kimi qalacaq".
Cavadın yoxluğunu hər an hiss edəcəklərini qeyd edən lisey kollektivi, bir sinif olaraq onun gerçəkləşməyən arzularını, ülvi istəklərini, ən kiçik diləklərini belə yaddaşlarında əbədi yaşadacaqlarını vurğulayıblar:
"Cavad xatirəmizdə parlaq bir günəş kimi qalacaq, onun yoxluğu qəlblərimizin ən incə simlərini həmişə titrədəcək. Onu tanımaq, onunla sinif yoldaşı olmaq, ona müəllimlik etmək böyük bir xoşbəxtlik idi, Cavadsız qalmaq isə ölçüləbilməyən bir kədərdir. Cavadla keçirdiyimiz hər an yaddaşımıza silinməz, xoş, isti duyğularla yoğrulmuş bir xatirəyə çevriləcək.
Cavadın ailəsinə və yaxınlarına dərin hüznlə başsağlığı veririk. Allah rəhmət eləsin. Qəbrin nurla dolsun. Məkanın cənnət olsun, İşıqlı İnsan. Allah səni sevənlərə, doğmalarına, ailənə səbr versin".
Həmidə İbrahimova
