Arvadını xəyanətə görə öldürmüşdü - Qayınatası onu bağışladı

Goranboyda həyat yoldaşı İ.Talıbovanın qətlində ittiham edilən 39 yaşlı M.Əliyevin (soyadlar şərtidir) məhkəməsi başa çatıb.

Ölkə.az “Qafqazinfo”ya istinadən xəbər verir ki, Gəncə Ağır Cinayətlər Məhkəməsində keçirilən prosesdə təqsirləndirilən şəxsə hökm oxunub.

Araşdırmalarla müəyyən edilib ki, M.Əliyev həyat yoldaşını qısqanclıq zəminində qətlə yetirib.

Belə ki, M.Əliyev arvadının başqa şəxslərlə münasibətdə olduğunu öyrənib. Həmin şəxslər arasında M.Əliyevin xalası oğlu da olub. Bu səbəbdən ailədə münasibətlər kəskinləşib. Qadın əməllərinə davam etdiyinə görə, M.Əliyev onu bıçaqlayaraq qətlə yetirib.

Gəncə Ağır Cinayətlər Məhkəməsində keçirilən prosesdə şahid qismində ifadə verən şəxslər İ.Talıbova ilə tanış olub münasibət qurduqlarını deyiblər.

Mərhumun atası məhkəməyə sənəd təqdim edərək M.Əliyevdən şikayətçi olmadığını bildirib.

Məhkəmənin hökmü ilə M.Əliyevə 9 il həbs cəzası verilib.