Saxta 100 manatı göstərərək... - Bakıda taksi sürücüsünü necə soydular?
Ölkə.az xəbər verir ki, məhkəmənin müəyyən etdiyi hallara görə, təqsirləndirilən şəxs tamah niyyəti ilə özgənin əmlakını açıq şəkildə ələ keçirmək məqsədilə 2026-cı ildə səhər saat 04:50 radələrində Binəqədi qəsəbəsində yerləşən "Spar" mağazasının qarşısında taksi sürücüsünə qarşı soyğunçuluq edib.
İş materiallarına əsasən, təqsirləndirilən şəxsin tanışı sərnişin qismində taksi ilə həmin ünvana gəlib. Yol haqqı 60 manat olub. Təqsirləndirilən şəxs taksi haqqını ödəyəcəyini bildirərək üzərində "etibarsızdır" yazısı olan 100 manatlıq əsginası sürücüyə göstərib və 100 manatın qalığı kimi 40 manat qaytarmasını istəyib. Taksi sürücüsü pulu qaytaran zaman o, sürücünün əlindən 40 manatı götürərək hadisə yerindən qaçıb. Nəticədə zərərçəkmişə 40 manat məbləğində maddi ziyan dəyib.
Məhkəmə iclasında təqsirləndirilən şəxs ittiham üzrə özünü tam təqsirli bilib. O bildirib ki, dostunu Bakıya işləmək üçün dəvət edib və taksi xərcini özü ödəyəcəyini vəd edib. Hadisə zamanı isə üzərində "etibarsızdır" yazılan 100 manatlıq əsginası sürücüyə göstərərək onun qaytardığı 40 manatı götürüb qaçdığını etiraf edib. Onun sözlərinə görə, həmin pulu şəxsi ehtiyaclarına xərcləyib.
Təqsirləndirilən şəxs polis tərəfindən saxlanıldıqdan sonra əməlini etiraf edib, zərərçəkmişə dəymiş ziyanı tam ödəyib və tərəflər arasında barışıq əldə olunub. O, həmçinin məhkəmədən cəza təyin edilərkən ilk dəfə cinayət törətməsini, vurduğu ziyanı könüllü şəkildə ödəməsini, eləcə də 2023-cü ilin sentyabrında Qarabağda keçirilən antiterror əməliyyatlarında iştirak edərək yaralanmasını nəzərə almağı xahiş edib.
Məhkəmə təqsirləndirilən şəxsi Cinayət Məcəlləsinin 180.1-ci (soyğunçuluq) maddəsi ilə təqsirli bilərək 1 il müddətinə azadlığın məhdudlaşdırılması cəzasına məhkum edib.
Bununla yanaşı, onun şübhəli şəxs qismində saxlanıldığı 2 gün müddət bir günə iki gün hesabı ilə cəzadan çıxılıb və üzərində qəti olaraq 11 ay 26 gün müddətinə azadlığın məhdudlaşdırılması cəzası saxlanılıb.
