\"İnanmıram ki, elə şey eləyim\" Qaynını güllələyən sərxoş

"Ayıldım ki, hərə bir söz deyir, başa düşmədim"

Sərxoş şəxs qaynının evini güllələdi.

Kürdəmirdə mübahisə qanla nəticələnib.

Hadisə Topalhəsənli kəndində qeydə alınıb. Kənd sakini Məhəmmədəli Abdullayev qaynı Natiq Dəmirovun evinə gəlib. Məhəmmədəli Abdullayev həddindən artıq içkili olmasına baxmayaraq yenə içki istəyib. N. Dəmirov buna etiraz edəndə mübahisə yaranıb.

Onların arasında baş verən münaqişə zamanı qəzəbinə qalib gələ bilməyən Abdullayev evinə gedərək ov tüfəngini götürüb və qaynının həyətinə girərək evin qapısına 26 dəfə atəş açıb.

Hər iki şəxs bədəninin bir neçə nahiyəsindən yaralanıb. Yaralılar Rayon Mərkəzi Xəstəxanasına aparılıblar. Tibbi yardım göstərilən şəxslər xəstəxananın travmatologiya şöbəsinə yerləşdiriliblər. Natiq Dəmirovun vəziyyəti ağır olduğundan Bakıda fəaliyyət göstərən tibb müəssisələrindən birinə yola salınıb.

Kürdəmir RPŞ əməkdaşlarının həyata keçirdikləri əməliyyat-axtarış tədbirləri nəticəsində Məhəmmədəli Abdullayev tutularaq, istintaqa təhvil verilib. Hadisə yerindən müvafiq sənədləri olmayan nömrəsi silinmiş “Arthems” markalı ov tüfəngi maddi sübut olaraq götürülüb.

İlkin dindirmədə M. Abdullayev içkili olduğundan törətdiyi hadisəni xatırlamadığını deyib:

"Bilmirəm, yadımda deyil ki, nə, necə olub. Ayıldım ki, hərə bir söz deyir. Mənə kimsə nəsə deyir, başa düşmürəm. Elə şey olar? Vallah bilmirəm. Nə demək olduğunu bilmirəm. İnanmıram ki, elə şey eləyim. Ayıq başla kim eləyər onu?"

Faktla bağlı cinayət işi açılıb, araşdırma aparılır. (Region TV)

Ölkə.Az