Ançelotti barədə həbs qərarı verildi
Ölkə.Az xəbər verir ki, İspaniyada vergi qanunvericiliyinin pozulması ilə bağlı iş üzrə "Real"ın sabiq baş məşqçisi, hazırda Braziliya yığmasına rəhbərlik edən Karlo Ançelotti barəsində məhkəmə qərarı elan edilib. Onun 2014–2015-ci illərdə İspaniya qanunvericiliyini pozduğu iddia olunurdu. Ümumi vergi borcu 1 217 958 avro təşkil edib. Bundan əlavə, Ançelottiyə 243 593 avro məbləğində cərimə və 47 298 avro məbləğində faiz ödənişi tətbiq olunub.
Prokurorluq bəyan edib ki, Ançelotti İspaniyada vergi rezidenti olduğunu təsdiqləməsinə baxmayaraq, yalnız "Real" klubundan aldığı əməkhaqqını bəyan edib, imic hüquqlarından əldə etdiyi gəliri isə vergidən yayındırıb.
EFE agentliyi bildirir ki, Madrid məhkəməsi Ançelottini 2014-cü ildə yol verdiyi vergi pozuntusuna görə bir il müddətinə şərti həbs cəzasına məhkum edib. AS nəşrinin yazdığına görə, cəza şərti xarakter daşıyır.
Bundan əlavə, Ançelottiyə 386 362 avro məbləğində əlavə cərimə tətbiq olunub və o, 3 il müddətinə dövlət yardımından və subsidiyalardan, habelə vergi və sosial təminat güzəştlərindən məhrum edilib.
Qeyd edək ki, 2015-ci ilə aid oxşar vergi pozuntusuna görə Ançelotti bəraət alıb.
Xatırladaq ki, daha əvvəl Madrid prokurorluğu Ançelotti üçün 4 il 9 ay müddətində həbs və 3 186 237 avro cərimə tələb etmişdi.
