Mourinyo istədi, Perez kisənin ağzını açdı - 70 milyona onu ala bilərlər

“Real Madrid” prezidenti Florentino Perez komandanın yeni təyin olunmuş baş məşqçisi Joze Mourinyonun transfer istəyini yerinə yetirməyə yaşıl işıq yandırıb.

Ölkə.az xəbər verir ki, bu barədə məlumatı tanınmış insayder Alberto Pereyra yayıb.

Mənbənin bildirdiyinə görə, klub rəhbəri portuqaliyalı mütəxəssisin “Mançester Siti” və Xorvatiya millisinin müdafiəçisi Yoşko Qvardiolun transfer edilməsi ilə bağlı tələbini bəyənib.

Qeyd olunur ki, “kral klubu” 24 yaşlı futbolçunun keçidini artıq bu yay transfer pəncərəsi zamanı reallaşdırmağa çalışacaq.

Məlumat üçün bildirək ki, gənc mərkəz müdafiəçisi 2023-cü ilin avqust ayından etibarən “şəhərlilər”in şərəfini qoruyur. Qvardiolun ingilis klubu ilə hazırkı müqaviləsinin müddəti 2028-ci ilin iyununa qədər nəzərdə tutulub. Hazırda xorvat futbolçunun transfer bazarındakı qiyməti təxminən 70 milyon avro dəyərində qiymətləndirilir.(qafqazinfo)