İngiltərənin birinci qolu niyə ləğv edilmədi? - FIFA-dan AÇIQLAMA
Ölkə.az xəbər verir ki, birinci hissənin sonunda qapı zərbəsi zamanı Norveç millisinin qapıçısı Eryan Nuland topu meydançanın üzərindən asılmış televiziya kabelinə vurub. Top trayektoriyasını dəyişərək yarımmüdafiəçi Elliot Andersona tərəf yönəlib. İngiltərə millisi hücumu davam etdirib və Cud Bellingemin qolu sayəsində hesabı açıb. Görüşün baş hakimi Kleman Türpen Norveç futbolçularının etirazlarına baxmayaraq, oyunu saxlamayıb və qolu hesaba alıb.
FIFA-dan bildirilib ki, topun daxilinə yerləşdirilmiş ötürücü kabelə hər hansı təması qeydə almayıb. FIFA-nın bəyanatında qeyd olunur:
"İngiltərə millisinin 45+2-ci dəqiqədə vurduğu qoldan əvvəl "Connected Ball" texnologiyasındakı ötürücü uçuş zamanı topun "nəbz"ində hər hansı dəyişiklik göstərməyib. Buna əsasən, topun yuxarı kabelə toxunması və hərəkət trayektoriyasını dəyişməsinə dair heç bir sübut yoxdur".
FIFA-nın sabiq hakimi Mark Klattenburq "Fox Sports"un efirində bildirib ki, top kənar cismə toxunduğu halda hakim oyunu saxlamalı və mübahisəli top təyin etməli idi. Onun sözlərinə görə, analoji vəziyyətlərdə videoköməkçi hakim sistemi (VAR) kömək edə bilərdi.(oxu.az)
