Mətn ölçüsü:
  • 100%

Azərbaycan sərhədləri açsın, testlər pulsuz edilsin - Deputatlardan təklif

Yeni turizm mövsümünün yaxınlaşması Azərbaycan sərhədlərinin xarici turistlər üçün açılması, turist qəbuluna başlanılması üçün müəyyən şərtlərin tətbiq olunub-olunmayacağı ilə bağlı suallar yaradıb. Belə ki, artıq bir sıra xarici ölkələr turistlərin cəlb olunması üçün işlərə başlayıb.

Elə qonşu Gürcüstan da quru sərhədlərini açmağı planlaşdırır. Belə ki, ölkənin iqtisadiyyat və dayanıqlı inkişaf naziri Natia Turnava Gürcüstan sərhədlərinin bir neçə həftə ərzində açılacağını deyib.

Təbii ki, yay mövsümündə sərhədlərin açılması turizm sektorunun canlanmasına, istirahət mərkəzləri, hotel və restoranların gəlir mənbəyinin artmasına, turizm şirkətlərinin vəziyyətinin yaxşılaşmasına səbəb olur. Bu da öz növbəsində ölkəyə valyuta axınını artırır, iqtisadi artıma dəstək olur və yeni iş yerlərinin açılmasına səbəb olur.

Bəs Azərbaycanda turist qəbuluna başlanılması gözlənilirmi? Sərhədlərin açılması zamanı hansı tələblərin qoyulması məqsədəuyğundur?

Turizm eksperti Ruslan Quliyev “Ölkə.az”a açıqlamasında bildirdi ki, bu gün daxili turizmdə vəziyyət qənaətbəxş sayıla bilər. Lakin hazırda xarici ölkələrdən, prioritet bazarlardan müştəri ala bilmirik:

“Buna səbəb ölkəyə giriş ilə bağlı məhdudiyyətlərdir. Baxmayaraq ki, AZAL və digər aviaşirkətlər artıq uçuşları bərpa edir ki, bu da ümidvericidir. 

Gözlənilən isə turist qəbulunda 48, 72 və ya 96 saatlıq koronavirus test nəticələrinin tələb olunmasıdır. Həmçinin bu ərəfədə təhlükəsiz turizm koridorları tətbiq olunarsa, müsbət nəticələr əldə etmək olar. Məsələn, Türkiyə-Gürcüstan-Azərbaycan misalında bu, ilk pilot layihə ola bilər. Burada karantin qaydalaraı ilə bağlı sahibkarların da üzərinə öhdəlik düşür”.

Məsələyə münasibət bildirən Milli Məclisin deputatı Razi Nurullayev bildirdi ki, Azərbaycanın bir çox rayonlarında hotellər bağlanıb, restoranlar, istirahət mərkəzləri sıradan çıxıb, toyların olmaması isə iqtisadiyyatı xeyli geri salıb, yüz minlərlə iş yeri bağlanıb. Bizə digər ölkələrə nisbətən sərhədləri daha tez açmaq, turistləri daha cəlbedici şərtlərlə dəvət etmək, test tələb etməmək, yalnız qızdırması olanları yoxlamaq lazımdır: “Geri dönənlərə də pulsuz test imkanları yaratmalıyıq. Turistlər burada test xərcindən dəfələrlə çox xeyir verəcək”. 

Millət vəkili bildirib ki, Çernoqoriya və Yunanıstan sərhədlərini tam açaraq turustləri qəbula hazırlaşır. Gürcüstan da gələn ay açılır. Çernoqoriya isə ağıllı hərəkət edir, gələnlərdən COVID-test tələb etmir, qayıdan turistlərə isə ölkələrinin tələb etdiyi tərzdə pulsuz testlər təşkil edəcək. Əsas məqsəd turistlərin bu ölkələrə gələrək pul xərcləməsidir:

“Gözləyək ki, bütün ölkələr sərhədlərini açsın, turistləri cəlb etsin, biz də onların uğurlarını oxuyaq?”

Millət vəkili Vüqar Bayramov isə mövzu ilə bağlı “Ölkə.az”a açıqlamasında bildirdi ki, sərt karantinin tətbiq olunmadığı müddətdə də ölkəmizə gəlişlə bağlı sərt qaydalar qüvvədə saxlanılıb. Yeni turizm mövsümünün başlanmasına az zaman qaldığını nəzərə alsaq, bu qaydaların da dəyişdirilməsinə ehtiyac var:

“Mövcud qaydalara əsasən, ölkəyə yalnız bizdə akkreditə olan xarici diplomatik nümayəndəlik və konsulluqların rəhbərləri, əməkdaşları və onların ailə üzvləri, valideynlərdən biri, həyat yoldaşı və ya azyaşlı övladı Azərbaycan Respublikası vətəndaşı olan əcnəbilər, ölkəmizdə işləmək, müvəqqəti və ya daimi yaşamaq icazəsi olan xaricilər və ali təhsil müəssisələrimizdə təhsil alan əcnəbi tələbələr gələ bilər. Bu o deməkdir ki, əgər bu meyarlara uyğun gəlməyən əcnəbinin müddətli koronavirus (COVID-19) neqativ PSR-testi nəticəsi varsa da, ölkəmizə daxil ola bilməz. 

Bu baxımdan daha məqsədəuyğun olardı ki, müddətli neqativ test nəticəsinə malik olan əcnəbilərin də ölkəmizə səfərinə icazə verilsin. Digər tərəfdən, AZAL bütün sərnişinlərdən uçuşdan 48 saat öncə alınmış koronavirus (COVID-19) neqativ PSR-testi haqqında çap edilmiş arayışı tələb edir. Son aylar reyslərin sayının az olduğunu nəzərə aldıqda tranzit uçuş edən sərnişlər üçün bu, bəzi hallarda çətinlik yaradır. Bu baxımdan, bir sıra digər ölkələrdə olduğu kimi bu müddətin 48 deyil, 72 saat müəyyənləşdirilməsi daha məqəsədəuyğundur”.

Ekspertlərin fikirlərindən belə qənaətə gəlmək olar ki, yeni mövsümdə ölkə üzrə sərhədlərin açılması, turist qəbuluna başlanması artıq çətin vəziyyətdə olan turizm sektoru üçün vacib addımdır.