Azərbaycanlı biznesmen qardaşların milyonlarına həbs qoyuldu

Rusiyanın Tverskoy Rayon Məhkəməsi azərbaycanlı iş adamları Müşviq və Allahverdi Abdullayev qardaşlarına məxsus şirkətlərin əmlakına həbs qoyub. 

“Ölkə.az” rus mətbuatına istinadən xəbər verir ki, əmlakların həbsi qərarı bu ilin aprel və may aylarında külli miqdarda dələduzluq faktı üzrə başlanılmış cinayət işi çərçivəsində verilib (Rusiya Federasiyası Cinayət Məcəlləsinin 159-cu maddəsinin 4-cü hissəsi). 

Məlumata əsasən, “TD Intertorg” şirkətinin (“Spar” franşizasının əməliyyat şirkəti) keçmiş top menecerləri 2018-ci ilin yanvarında “Sberbank”dan kredit alarkən bilərəkdən yalan məlumatlar verməkdə, saxta sənədlərdə şirkətin maliyyə göstəricilərinin yüksək qiymətləndirilməsində təqsirləndirilirlər. Şirkət sahibi olan qardaşların "Sberbank”dan götürdükləri 8 milyard rubl dəyərindəki krediti mənimsədikləri qeyd olunur.

Məsələ Rusiya İqtisadi Təhlükəsizlik Xidməti və Daxili İşlər Nazirliyi əməkdaşlarının “TD Intertorg” şirkətində apardıqları yoxlamadan sonra ortaya çıxıb. Bununla da, cari ilin mart ayında təhlükəsizlik qüvvələri iş adamı Allahverdi Abdullayevi və “TD Intertorg”un top menecerləri - maliyyə direktoru Marianna Levintova və vəkil İqor Zaşçerinskini saxlayıb.

Qeyd edək ki, ötən ilin fevral ayında Sankt-Peterburq Arbitraj Məhkəməsi “TD Intertorg”u müflis elan edib. 

Hazırda isə məhkəmənin ümumi dəyəri 2 milyard rubl (47 mln manat - ölkə.az) olan daşınmaz əmlaka həbs qoyduğu deyilir. Həbs qoyulan daşınmaz əmlak siyahısına Sankt-Peterburqda yerləşən bir neçə obyekt - Leninski prospektindəki ticarət mərkəzi, Moskovskaya küçəsindəki bir mənzil, Novoçerkasskaya küçəsindəki bir ofis və şəhərin müxtəlif yerlərində yerləşən daha yeddi ofis binası daxildir. Həmçinin Moskvada Tişinski küçəsindəki bir mənzilə də həbs qoyulduğu deyilir.

Könül

Ölkə.Az