Bakı metrosunda xlor dağıldı, həyəcanlı anlar yaşandı

Bakı metrosunun "Gənclik" stansiyasının vestibülündə bir sərnişinin əlindən içində xlor maddəsi olan şüşə balon düşüb.

Bu barədə "Ölkə.Az"a "Bakı Metropoliteni" QSC-dən məlumat verilib.

Bildirilib ki, bu zaman maye buxarlanması olub. Dərhal müvafiq tədbirlər görülüb, o cümlədən balonun düşdüyü yer təmizlənib.

"Sərnişinlərin təhlükəsizliyinə xələl gətirə biləcək hadisə baş verməyib", - deyə qurumun açıqlamasında qeyd olunub.

"Bakı Metropoliteni"ndən "Ölkə.Az"a bildirilib ki, daşınan kimyəvi təmizləyici (maye) maddənin toz halında olan digər təmizləyici (xlor) maddə ilə reaksiyaya girməsi nəticəsində ani alışma baş verib.

***

"Operativ şəkildə müdaxilə edilib, bütün müvafiq təhlükəsizlik tədbirləri görülüb. Sərnişinlər arasında xəsarət alan olmayıb. Hazırda araşdırma davam edir. Onu da qeyd edək ki, həmin təmizləyici maddənin metropoliten daxilinə buraxılmasına məhdudiyyət yoxdur", - deyə məlumatda qeyd olunub.