Azərbaycanda dollara tələb artdı

Azərbaycanda dollara tələb artdı - SƏBƏB

Ötən həftə hərraclarda dollara tələb artıb. Belə ki, 10-17 avqust tarixlərində Mərkəzi Bankın təşkil etdiyi 3 valyuta hərraclarında 127,9 milyon dollar satılıb. Bu, əvvəlki uyğun müddətdə təşkil edilən 3 hərrac ilə müqayisədə 27,3% çox satış deməkdir.

"Ölkə.Az" xəbər verir ki, bunu iqtisadçı deputat Vüqar Bayramov deyib. O bildirib ki, bu, son hərraclarda dollar tələbinin hiss edilən səviyyədə yüksəlməsindən xəbər verir:

"Dollara tələbin artması mövsümi iqtisadi səbəblər ilə yanaşı psixoloji faktorlarla da bağlıdır. Belə ki, yay mövsümünün sona yaxınlaşması, idxalın artması dollara yeni tələb yaradır. Bununla yanaşı, qonşu ölkələrdəki volatillik, xüsusən də Rusiyada rublun ucuzlaşması valyuta bazarına psixoliji təsir formalaşdırır".

Millət vəkilinin sözlərinə görə, bu ilin birinci yarısında 8 milyard 198 milyon dollarlıq idxal qeydə alınıb. Bu ötən ilin uyğun dövrü ilə müqayisədə 22,5% çoxdur. İdxalın artması isə dollara daha çox tələb yaradır.

"Dollara tələbin artması konteksində manatın məzənnəsinin necə dəyişməsi hələ də birbaşa Mərkəzi Bankın mövqeyindən asılıdır. Azərbaycan üzən məzənnə rejiminə keçmədiyi üçün valyuta bazarındakı tarazlığı Mərkəzi Bankın qərarları müəyyənləşdirir", - deyə V. Bayramov əlavə edib.

Könül
Ölkə.Az