Azərbaycanda tikinti materialları ucuzlaşıb: Səbəb nədir?
"Son 2 il ərzində tikinti materiallarının qiymətində müşahidə edilən süni qiymət şəkildə artımı yerli istehsal məhsullarına olan təlabatı aşağı saldı". Bunu Qaynarinfo-ya əmlak məsələləri üzrə ekspert Ramil Osmanlı son zamanlar tikinti materiallarının qiymətlərində müşahidə olunan ucuzlaşmanı dəyərləndirərkən deyib.
Ekspert qiymətlərin enməsinin səbəbini belə izah edib:
"Qiymətlərin süni şəkildə artımından sonra bir sıra tikinti layihələrinin icrası zamanı podratçılar xarici bazara üz tutmağa məcbur oldular. Nəticə etibarı ilə tikinti materiallarının qiymətlərini süni şəkildə bahalaşdıran şəxslər öz bazarlarına mənfi təsir göstərdilər və qiyməti azaltmağa məcbur oldular. Səbəb daha çox bununla bağlıdır”
Ramil Osmanlı hesab edir ki, Azərbaycanın işğaldan azad olunmuş ərazilərində tikinti bumunun sürətlənməsindən sonra yerli istehsalçıların maraqları artmağa başladı.
"Əslində, bu gün tikinti bazarında olan qiymətlər də bahadır və adekvat deyil. Qiymətlər bir qədər də aşağı salına bilər", deyə ekspert vurğulayıb.
