\"ABŞ Mərkəzi Bankının qərarı Azərbaycanın valyuta rezervlərini artıracaq\"

FED mərkəzləşdirilmiş kreditlər üzrə uçot dərəcəsinin artırılmasına – 0,25%-dən 0,50%-ə çatdırılmasına qərar verilib.

ABŞ Mərkəzi Bankının aldığı bu qərarın Azərbaycana da təsir edəcəyi deyilir. Bəziləri hətta ikinci devalvasiyanın olacağını iddi edir.

Azərbaycanın keçmiş maliyyə naziri professor Saleh Məmmədov ABŞ Mərkəzi Bankının aldığı bu qərarı və onun Azərbaycana mümkün təsirlərini Ölkə.Az-a verdiyi açıqlamasında şərh edib:

"ABŞ Mərkəzi Bankının aldığı bu qərar bütün dünyada dolların gücləndirilməsinə hesablanıb. Bütün dünya bir neçə ay idi ABŞ Mərkəzi Bankı – FED-in Federal Açıq Bazar Komitəsinin toplantısını və toplantıdan sonra mərkəzləşdirilmiş kreditlər üzrə uçot dərəcəsini artıra biləcəklərini müzakirə edirdi. ABŞ Mərkəzi Bankının aldığı bu qərar dolların faizinin artırılması deməkdir. Bu eyni zamanda bütün dünyada dolların kursunun möhkəmlənməsinə gətirib çıxaracaq. Bu qərar Azərbaycanda dolların manata nisbətən güclənməsinə təsir edə bilər. Ancaq bu Azərbaycana ciddi təsir edə bilməz. Manatda yumuşalma ola bilər, ancaq bizdə manat üzən valyuta kursu ilə tənzimlənmir. Ona görə də, Mərkəzi Bank bunun hər an qarşısını ala bilər.

Bunun Azərbaycana müsbət təsiri də ola bilər. Bizim valyuta rezervlərimizin təqribən 60%-dən çoxu dollarla saxlanılır. Bu da bizim dollarla saxladığımız depozitlərin faizinin artmasına gətirib çıxara bilər. Dünya miqyasında dolların faizinin artması o deməkdir ki, valyuta rezervlərimiz artacaq. Dolların kredit faizi artırılırsa, demək onun qəbul olunan depozit faizi də artırılır. Bu da bizə müsbət təsir göstərəcək.

Mərkəzləşdirilmiş kreditlər üzrə uçot dərəcəsinin artırılmasının Azərbaycana ciddi bir təsiri olmayacaq. Milli valyutamız ciddi surətdə dəyərdən düşməyəcək. Ölkədə isə devalvasiya gözlənilmir.

ABŞ Mərkəzi Bankının aldığı qərar Azərbaycana iki cür təsir edə bilər. Birincisi, dolların manata nisbətən kursunun qalxmasına gətirib çıxara bilər. O da Mərkəzi Bank vasitəsi ilə tənzimlənəcək. İkincisi isə, əksinə bu qərarın müsbət təsiri ola bilər, çünki valyuta rezervlərimiz böyükdür və onun çox hissəsi dollarla saxlanılır. Bizim valyutamıza verilən depozit faizləri artırıla bilər. Bu da bizim gəlirlərimizi artıra bilər".

Qeyd edək ki, FED, 2008-ci ilin dekabr ayından bəri faiz dərəcələrini 0% - 0.25% aralığında saxlayırdı.

Səxavət Məmməd
Ölkə.Az