Neftin qiyməti 72 dollara endi
Neftin qiyməti İran müharibəsindən öncəki səviyyəyə enib.
"Ölkə.az" xəbər verir ki, buna səbəb Hörmüz boğazı vasitəsilə gəmi hərəkətinin tədricən bərpa olunmasıdır.
Qlobal etalon sayılan "Brent" markalı neftin bir barelinin qiyməti qısa müddət ərzində 72,48 dollardan aşağı düşüb. Bu, ABŞ və İsrailin İrana qarşı hücumlara başlamasından əvvəlki səviyyəyə uyğundur.
Xatırladaq ki, İranın zərbələrə cavab olaraq neft və qaz daşımaları üçün kritik əhəmiyyət daşıyan Hörmüz boğazını faktiki olaraq bağlamasından sonra enerji bazarlarında qiymətlər kəskin dalğalanmalara məruz qalmışdı.
ABŞ və İranın iyunun 17-də Tehranın nüvə proqramı və müharibənin başa çatdırılmasına yönəlmiş digər tədbirlərlə bağlı 60 günlük danışıqlar müddətini nəzərdə tutan Anlaşma Memorandumu imzalamasından sonra isə xam neftin qiyməti sürətlə ucuzlaşıb.
