Rayonlarda kirayə evlər buna görə BAHALAŞIB
Azərbaycan Rieltorlar Assosiasiyasının rəhbəri, daşınmaz əmlak və inşaat üzrə ekspert Elnur Azadov Ölkə.az-a açıqlamasında bildirib ki, regionlarda yerləşən villa şəhərciklərində və istirahət zonalarında kotteclərin, eləcə də vətəndaşlar tərəfindən kirayəyə verilən mənzillərin və otaqların qiymətləri kifayət qədər fərqlidir:
“Bir sutkalıq qalma xidmətinin qiyməti regiondan, rayondan və yerləşdiyi ərazidən asılı olaraq dəyişir. Ekonom tipli evlərdə qiymətlər adətən 100-150 manat təşkil edir. Orta kateqoriyaya aid istirahət zonalarında və evlərdə bu məbləğ 150-200-dır. Premium villa şəhərciklərində və kotteclərdə isə qiymətlər gündəlik 300 manatdan başlayır, hətta 500 manata qədər yüksələ bilir. Daha böyük villalarda, bir neçə ailənin və ya böyük bir ailənin yerləşə bilməsi də qiymətlərə təsir göstərir”.
Onun sözlərinə görə, qiymətlər əsasən tələbata uyğun formalaşır. E.Azadov vurğulayıb ki, turizm aktivliyinin yüksək olduğu zonalarda qiymətlər də daha baha olur. O, buna nümunə kimi İsmayıllı-Qəbələ zonasını göstərib. Deyib ki, bura ən aktiv turizm bölgələrindən biridir: “Burada turist axını olduqca çoxdur və bu səbəbdən qiymətlər ölkə üzrə ən yüksək səviyyələrdədir. Həmçinin Bakı ətrafındakı bəzi dənizkənarı ərazilərdə də oxşar vəziyyət müşahidə olunur.
İkinci yerdə isə Xaçmaz-Nabran zonası gəlir. Bu bölgə artıq müəyyən populyarlığını itirib. Son 5-6 il ərzində həmin bölgəyə turist axını azalıb. Xaricdən gələn turistlərin sayı kifayət qədər aşağıdır və əsas yük daxili turizmin üzərinə düşür. Xarici turistlərin payı burada təxminən 5-10 faiz təşkil edir”.
Ekspert qeyd edib ki, Quba-Qusar zonasında isə əksinə, tələbat artıb:
“Ən aktiv bölgələrdən biri məhz Quba və Qusardır. Burada çoxlu sayda hotellər var. Tələbat yüksək olaraq qalır. Bu da qiymətlərin yüksək səviyyədə saxlanmasına səbəb olur.
Qiymət artımının əsas səbəbi birinci növbədə tələbatdır. İkinci isə ölkədə daşınmaz əmlakın bahalaşması və inflyasiyadır. Son illərdə vətəndaşların xərcləri artdığından, buna da mütənasib qiymət artımı müşahidə olunur”.
Həmidə İbrahimova
