Azərbaycan şirkəti Google Rəsmi Partnyoru oldu
2015-ci ilin sentyabr ayında Azərbaycanda fəaliyyətə başlayan Beyond Click şirkəti böyük uğur əldə edib. Belə ki, şirkət bu yaxınlarda Google tərəfindən rəsmi partnyor elan edilib.
Beyond Click şirkətindən "Marja"ya bildirilib ki, partnyorluq əldə etmək üçün bir sıra tələblərə cavab vermək lazımdır. Tələblərin hər birini qarşılayan şirkət Google şirkətinin partnyorluğundan yararlanaraq müştərilərinə daha professional xidmət verəcək. Həmçinin, Google şirkətinin əməkdaşları birbaşa olaraq məsləhətlərini verəcəkdir.
Şirkətin qurucusu və rəhbəri Qiyas Hüseyn “Əldə etdiyimiz bu uğur hələ bizim üçün başlanğıcdır. Azərbaycan dijital reklam bazarında bir neçə şirkət Google Rəsmi partnyorluğunu əldə edib. Bizim bu bazarda olmağımız rəqabəti gücləndirəcək və ortaya keyfiyyətli işlərin çıxmasına səbəb olacaq. Digər agentliklərin qiymətləndirmə sistemi reklama ayrılan büdcə üzərindən aparılır. Lakin biz tamam fərqli qiymətləndirmə üsulları təklif edirik ki, bu da müştərilərin marağına səbəb olmaqdadır”
Hal-hazırda Paşa Bank, Kristal Abşeron, Delta Group Travel kimi böyük şirkətlərlə çalışan Beyond Click müştəri portfelini sürətlə genişləndirir. Xatırladaq ki, Beyond Click şirkəti əməkdaşlığa başladıqları yeni şirkətlərə ilk bir ay test mərhələsini tamamilə pulsuz yerinə yetirir. Bu müddət ərzində yerləşdirilən reklamlar professional konsultantlar tərəfindən analiz edilir və optimal büdcə müəyyənləşdirilir. Şirkətin fəlsəfəsi tamamilə şəffaf çalışmaq və müştəri büdcəsinin istifadəsini tamamilə optimallaşdırmaqdır.
Həm Azərbaycan, həm də Türiyədə fəaliyyət göstərən Beyond Click şirkəti Sosial Media hesablarının idarə edilməsi, dijital dizayn, kontent menecment, SEO, dijital kampaniyaların idarəedilməsi və s. xidmətləri təklif edir.
