Qubada atasını amansızlıqla öldürən oğula HÖKM OXUNUB

Qubada atasını xüsusi amansızlıqla qətlə yetirməkdə təqsirli bilinən Mətləb Şükürovun cinayət işi məhkəmə prosesi başa çatıb.

"Ölkə.Az" xəbər verir ki, hakim Əhməd Quliyevin sədrliyi ilə keçirilən iclasda təqsirləndirilən şəxsə hökm oxunub.

Məhkəmənin hökmü ilə Mətləb Şükürov 14 müddətinə azadlıqdan məhrum edilib.

İttihama görə, hadisə ötən il fevralın 15-də Qubanın Birinci Nügədi kəndində baş verib.

Kənd sakini Bəşarət Şükürova məxsus evdə onun üzərində çoxsaylı kəsilmiş-deşilmiş yaraları və zorakılıq əlamətləri olan meyitini aşkar edilib.

Məlum olub ki, Bəşarət Şükürovu öz oğlu, 19 yaşlı Mətləb Şükürov qətlə yetirib. Dəfələrlə atası ilə mübahisə edən Mətləb Şükürov növbəti münaqişə zamanı atasına çoxsaylı bıçaq zərbələri vurub, daha sonra isə belin taxta sapı və dəmir hissəsi ilə zərbələri endirərək qətlə yetirib.

61 yaşlı Bəşarət Şükürov Rusiya vətəndaşı olub. Rusiyada sahibkarlıqla məşğul olan Bəşarət Şükürov fevralın 14-də Quba rayonuna gəlib.

İstintaq orqanı tərəfindən Mətləb Şükürova Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə ittiham verilib.

Ölkə.Az