\"Xoxan\"ın qala gecəsi keçiriləcək

Dekabrın 8-də Nizami Kino Mərkəzində "Xoxan" milli komediya filminin qala gecəsi keçiriləcək.

Ölkə.Az AFİŞA xəbər verir ki, saat 19:00-da başlayacaq təqdimata biletlər artıq mərkəzin kassalarında satışa çıxarılıb. Biletlərin qiyməti 15 AZN-dir.

Rejissor Samir Kərimoğlunun  çəkdiyi bu  filmdə rolları aktyorlar  Fərda Amin, Elməddin Cəfərov, Nigar İbrahimova, Ələsgər Məmmədoğlu, Şəhriyar Əbilov, Aynur Hüseyn, Nərgiz Zamir və başqaları canlandırıblar.

“Xoxan” filmi varlı bir qadının qızının bədəninə cin girməsindən bəhs edir.

Bu bəladan qurtarmaq üçün  qadın yaşadıqları villanı satmaq qərarına gəlir. Amma cin bu işin alınmasına mane olur. Villanın  satışıyla  məşqul olan rieltor, cinin qızın bədənindən qovulmasını yüz min manat pul mukafatı qarşılığında  iki məşhur baxıcı – avantyurist Rəftar və Qəhrəmana təklif edir. Və sonra nələrin  baş verəcəyini heç kim bilmir... 

Tamaşaçını “gülməkdən öldürəcəklərini” vəd edən filmin yaradıcı qrupu sözlərini tutacaqlarına əmindirlər. 

Qala gecədə filmin rejissoru Samir Kərimoğlu, baş rolları ifa edən aktyorlar və yaradıcı qrupun digər üzvləri iştirak edəcəklər. Filmdən əvvəl, qonaqlar tamaşaçılarla görüşmək üçün səhnəyə çıxacaqlar. 

Ölkə.Az