Yeni “iPad” nə vaxt gəlir?

“Apple” oktyabrın 21-də “iPad” planşet kompüterinin yeni nəslini nümayiş etdirəcək

Ölkə.Az-ın Texnobaz.com-a istinadən verdiyi xəbərə görə, həmin gün altıncı nəsil “iPad” və üçüncü nəsil “iPad mini” planşetlərinin təqdim ediləcəyi gözlənilir.

Yeni planşetlərin ekran ölçüləri uyğun olaraq,  9.7 və 7.9 düym olacaq.

Xatırladaq ki, bu gündən istifadəçilər yeni “iOS 8” əməliyyat sistemini yükləyə bilərlər.

“iOS 8″ mobil platformasının əsas yeniliklər sırasında “HealthKit” fitnes-platforması, mahnıların səs əmri vasitəsilə tanınması, mesaj və multimedia məzmunu ilə daha asan mübadiləni qeyd etmək olar.

Yeni “iOS 8″ sistemində daxili “Healthkit”  platforması və “Health” tətbiqi istifadəyə verilib. Proqram addımların sayını, qət edilmiş məsafəni, sərf edilmiş kalorini, təzyiq, nəbz, qanda qlükozanın səviyyəsini və başqa göstəriciləri qeydə alır. Tətbiq, həmçinin hansısa göstərici normadan artıq və ya az olduqda həkiminizə bu haqda mesaj göndərə bilər.

Başqa bir funksiya musiqinin tanınmasıdır. Bundan ötrü “Apple” şirkəti “Siri” səs köməkçisi ilə “Shazam” xidmətini birləşdirib. Nəticədə istifadəçi smartfondan hazırda hansı musiqinin səsləndiyini soruşa biləcək və “Siri” səs köməkçisi “Shazam” xidmətinin köməyi ilə tanıma sistemini işə salacaq.

“iCloud fotoarxivi” funksiyası şəkilləri qurğularda sinxronlaşdırır, həmçinin şəklin redaktəsi üçün yeni funksiyalara (parlaqlıq, ziddiyyət, rəng və başqa xüsusiyyətlərin sazlanması) giriş təmin edir. Bütün redaktə və effektlər avtomatik istifadəçinin bütün qurğularında yenilənir.

Ölkə.Az