Kimlər Şaxta Baba ola bilər? - Evə çağırılan Yeni il personajlarının QİYMƏTLƏRİ
Şaxta Baba Milad ərəfəsində uşaqlara, şokoldalar, oyuncaqlar və müxtəlif hədiyyələr paylayan əfsanəvi personajdır.
Hər şeyin biznes dəyəri ilə ölçüldüyü 21-ci əsrdə şaxta babanın mahiyyəti sevindirməkdirsə, artıq insanlar körpələri əyləndirmək üçün onlar Şaxta Babaları “sevindirməli” olurlar.
Apardığımız kiçik bir araşdırma zamanı bəlli oldu ki, Qərb ölkələrində Şaxta Baba (Santa Klaus) olmaq üçün bəzi şərtlər var. Belə ki, nağıllardan, əsərlərdən çıxan Santa Klaus artıq bir peşəyə çevrilib. Hər il Milad ərəfəsində şirkətlər bunun üçün vakansiyası elan edir. Lakin heç də hər kəsə bu fəaliyyətlə məşğul olmaq üçün icazə verilmir.
Sözügedən personajı canlandıran şəxslərin məhkumluğu olmalıdırlar. Əgər onların əllərində, boynunda və s. tatu varsa, bu, mütləq gizlədilməlidir. Həmçinin Santa Klauslara xüsusi formada “ho”, “ho”, “ho” demək də öyrədilir. Onların iş prinsiplərindən biri də azyaşlılara təbəssüm etməsi və sehrli görünməsidir. Çünki əgər Santa Klausa uyğun gəlməyən ən kiçik detal varsa, bu, sehri poza bilər.
Ölkə.Az Azərbaycanda Şaxta Babaların qiyməti ilə də maraqlanıb. Məlum olub ki, qiymətə təsir edən bir sıra amillər var.
Belə təşkilatçılıq edən müəssislərdən bildirilib ki, evinə təkcə Şaxta Baba dəvət etmək istəyənlər 30 dəqiqə üçün 50 manat, 1 saat üçün isə 70 manat ödəməlidir.
Əgər bu siyahıya Qar Qız da əlavə olunsa, yarım saat üçün ödənişin məbləği 70 manat,1 saat üçün isə 100 manat olacaq.
Tək Şaxta Baba şar və kağız, köpük, alov şousu edəcəksə, qiymət 75-120 manat arasında dəyişəcək. Əgər yeni il şənliyi üçün digər cizgi film personajları da dəvət olunacaqsa, qiymət bir az da artacaq.
Həmçinin əgər sizə rus dilində danışan Şaxta Baba lazımdırsa, bunun üçün 100 manatdan keçməlisiniz.
Bəzi şəxslər isə bu xidməti hər iki dildə yarım saatı 40, 1 saatı 50 manata təklif edir.
Təşkilatçıların sözlərinə görə, qiymətə təsir edən daha bir amil isə ayın tarixidir. Belə ki, 29 dekabradək Şaxta Babanın 1 saatı 70 manat olsa da, 30-31 dekabrda qiymət 100 manata qalxır.
Təşkilatçılardan biri isə illərdir eyni şəxslərlə işlədiklərini, təhlükəsiz olduqlarını və evlərə göndərilən Şaxta Babaların aktyorluq fakültəsini bitirən şəxslər olduğunu, professsional xidmət göstərdiklərini deyib.
Digər bir məsələ isə Şaxta Babaların ünvana çatdırılmasıdır. Əgər bu personaj məkana özü gedirsə, qiymətə daha 20-30 manat əlavə olunur, əgər onu ev yiyəsi maşınla aparacaqsa, bunun üçün əlavə pul ödəmək lazım deyil.
O qədər də tələbat olmadığından və əsas “yük” Şaxta Babanın üzərinə düşdüyündən Qar Qızın qiyməti elə də çox deyil.
Bundan əlavə, paytaxtın mərkəzi hissələrində fəaliyyət göstərən Şaxta Babalar da var ki, onlar üçün xüsusi lisenziya verilməlidir.
Bakı Şəhər İcra Hakimiyyətinin İctimai-siyasi, humanitar məsələlər və dini qurumlarla iş şöbəsinin müdir müavini İsrafil Kərimov isə Ölkə.Az-ın sorğusuna cavab olaraq bildirib ki, Yeni il ərəfəsində Şaxta Baba kimi fəaliyyət göstərmək istəyən şəxslər əraziyə uyğun olaraq Bakı Abadlıq İdarəsinə, Bakı Şəhər Ticarət və Xidmət Departamentinə və Dənizkənarı Bulvar idarəsinə müraciət etməlidirlər.
Lisenziya üçün şərtlərdən məlumatsız olduğunu deyən BŞİH rəsmisi əlavə edib ki, demək olar, 2 ildir bunun üçün quruma müraciət edən olmayıb.
Billurə Yunus
Ölkə.Az
