Roma papası uşaq vaxtı görün nə olmaq istəyib: "Onların pulu çox idi..."

"Ölkə.Az" Türkiyə mətbuatına istinadən xəbər verir ki, İtaliyanın ictimai yayımı Rai-də yayımlanan məşhur "Che tempo che fa" (Hava necədir?) verilişinin dünən axşamkı buraxılışında Papa Françeskodan təxminən bir saatlıq müsahibə alınıb. Papa aparıcı Fabio Fazionun "uşaqlıqda böyüyəndə nə olmaq istəyirdin" suala belə cavab verib:

"İndi deyəcəklərim sizi təəccübləndirəcək: Həmişə qəssab olmaq istəmişəm. Niyə? Çünki nənəm və anamla alış-verişə gedəndə gördüm ki, qəssabın belində çanta var və əlindəki pulu ora qoyur. Ona görə də dedim ki, qəssab olmaq istəyirəm, çünki onların pulu çox idi”.

O özündən əvvəl bu postu tutanlardan fərqli olaraq Papa sarayında deyil, hoteldə yaşamağı seçdiyini insan olmaq zərurətilə izah edib:

"Dostlara ehtiyacım var. Papa evində yaşamamağımın səbəblərindən biri də budur. Əvvəlki papalar müqəddəs idilər, mən o qədər də müqəddəs deyiləm, insan münasibətlərinə ehtiyacım var. Ona görə də Santa Marta hotelində qalıram, baxıram, danışıram. Dostluqlar mənə güc verir. Azdır, amma mənim həqiqi dostlarım var”.

Musiqi zövqündən də danışan Papa Françesko klassikanı və tanqonu sevdiyini bildirib. Argentinanın paytaxtı Buenos-Ayresdə anadan olan Papa, "bu şəhərdə tanqo oynaya bilməyən adam əsl Buenos-Ayresli deyil" deyib.

Natiq
Ölkə.Az