Bakıda evlənmək istəyənlərin yeni məkanı - 20 yaşından tutmuş 70 yaşına qədər...

Paytaxtda fəaliyyət göstərən “Orxideya” Nikah Agentliyinin icraçı direktoru Leyla Ağayeva Referans.az-ın suallarını cavablandırıb.
 

L. Ağayeva “Orxideya” Nikah Agentliyinin 15 ildən artıqdır ki, fəaliyyət göstərdiyini və bu müddət ərzində 20 yaşından tutmuş 70 yaşına qədər insanların onlara müraciət etdiyini deyib:
 

“Agentliyimiz 15 ildən artıqdır fəaliyyət göstərir və bu müddət ərzində çox evliliklərə imza atmışıq. Bizə demək olar hər yaş qrupundan olan insanlar müraciət edir. Müraciət edənlərin əksəriyyəti istər qız, istər oğlan öz valideynləri ilə yaxınlaşır. Xarici ölkələrdə olan vətəndaşlarımızdan bizə müraciət edənlər olur. 60, 70,  yaşında qadınlar, kişilər  evlənmək üçün bizimlə əlaqə saxlayır.”
 

Sizə müraciət edənlərin səmimiyyətinə necə inanırsınız sualına cavab olaraq L. Ağayeva onlardan bir çox sənədin əslini və kopyasını istədiklərini hətda yazılı ərizə belə aldıqlarını bildirib.
 

“Bizimlə əlaqə saxlayan şəxslərdən ciddi sənədlər tələb edirik, şəxsiyyətini təsdiq edən sənədin əsli və kopyası, əvvəl evli olubsa boşanma sənədini və yaşadığı ərazidən yaşayışı təsdiq edən sənədləri təqdim etməlidir, Daha sonra həmin şəxs ərizə yazır və qeydiyyatdan keçir.   

 

-Daha çox hansı yaş aralığında insanlar sizə müraciət edir?
 

“20 yaşından 70 yaşına qədər olan yaş qrupundan bizə müraciət edənlər olur. Əslində mən deyərdim ki, hər yaş qrupundan bizimlə əlaqə saxlayanlar olur, amma əksər hallarda 30-40 yaş aralığında müraciət edənlər az da olsa, üstünlük təşkil edir. Bəzən  60-70 yaşında kişilər və ya qadınlar bizə müraciət edib oğul qızlarını evləndirdiklərini indi isə tək yaşadığları üçün özlərinə bir qulaq yoldaşı, yol yoldaşı axtardıqlarını bildirirlər. Hətta 2 gün əvvəl bir qız mənə zəng edib anasını evləndirmək istədiyini bildirdi. Təsəvvür edin, qız anasını evləndirir və ya atasını, bu cürə maraqlı müraciətlərimiz da olur.” 
 

Müraciət edənlər daha çox kişilər olur yoxsa qadınlar?
 

“Xeyr, demək olar ki, eynidir, çox kiçik bir fərqlə kişilərin müraciətinin üstünlük təşkil etdiyini deyə bilərəm. Bəzi hallarda qazilər və ya müharibə iştirakçıları da bizimlə əlaqə saxlayıb evlənmək istədiklərini bildirirlər.”
 

-Hər hansı bir dövlət qurumları sizə müdaxilə edib? 
 

“Xeyr, belə bir hal heç vaxt yaşanmayıb, “Orxidey” Nikah Agentliyi tam müstəqil və rəsmi fəaliyyət göstərir. 
 

-Valideynlərindən xəbərsiz sizə müraciət edənlər olub heç?
 

“Elə hallara yol vermirik, Bizimlə əlaqə saxlayan şəxslər valideynləri ilə gəlir. Elə olmadığı halda həmin şəxsin ata və ya anasıyla əlaqə saxlayırıq və ya hər iki valideyndən birinin telefon nömrəsini alıb onlara mövzuyla bağlı məlumat veririk.”