Almanlar Azərbaycanda iki yüzə yaxın artefakt aşkar ediblər

Azərbaycanın Mil-Qarabağ regionunda qazıntılar aparan beynəlxalq Azərbaycan-alman arxeoloji ekspedisiyası iki yüzə yaxın artefakt aşkar edib.

Ekspedisiyanın rəhbəri Almaniyanın Geydelberq Universitetinin professoru Barbara Helvinin məlumatına əsasən, tapıntılar Neolit dövründən orta əsrlərə qədər olan dövrə aiddir.

Əsasən Ağcabədi rayonunun ərazisində yerləşən qədim məskən Kamiltəpədə aparılan qazıntılar zamanı çiy kərpicdən hazırlanmış dairəvi tikili aşkar edilib. Alimlər ehtimal edirlər ki, yan divarlarının hündürlüyü 3 metrə çatan bu tikili Neolit dövrünə aiddir və bu ərazidə qədim gil-kərpic memarlığının yetərincə yüksək səviyyədə olmasının göstəricisidir.

Tədqiqatçıların marağına səbəb olan digər bir amil isə burada tapılan tranşeylərdir.

Helvinin sözlərinə görə, bu cür tikililər Qafqazda aparılan qazıntılarda ilk dəfə aşkar edilib. İlkin olaraq alimlər bunun su arxları olduğunu ehtimal ediblər. Daha sonra isə tikilinin divarlarının bişməmiş gildən hazırlanan çiy kərpicdən tikildiyi müəyyən edilib. Bu isə alimləri tranşeylərin müdafiə və ya məişət məqsədi ilə istifadə edilə biləcəyi fikrinə gətirib.

Ekspedisiyanın rəhbəri qeyd edib ki, bu, Kamiltəpədə aşkar edilmiş ən qədim abidələrdəndir. Tranşeylərin bizim eradan əvvəl altıncı əsrə aid olduğu ehtimal edilir.

“Mil-Qarabağ regionunda aparılan qazıntılar, Neolit və Eneolit dövründə bu ərazinin gözəl landşafta və içməli su mənbələrinə malik olduğunu, bunun isə bu ərazidə oturaq əkinçilik mədəniyyətinin formalaşmasına səbəb olduğunu göstərir”, ekspedisiyanın rəhbəri deyib.

Hal-hazırda beynəlxalq ekspedisiyanın üzvləri aşkar edilən abidələrin qeydiyyatı və kartoqrafiyasının tərtibi ilə məşğuldurlar.xou.az

Ölkə.Az