Azərbaycan və Türkiyə bu oğlanın sevgisinin müdafiəsinə qalxdı

Sevgilisindən əfv diləyən azərbaycanlı gənc qeyri-adi üsula əl atıb.

Suğra adlı sevgilisindən bağışlanmasını istəyən Əli Quluzadə adlı azərbaycanlı gənc istəyinə nail olmaq üçün videoçarx hazırlayıb. Videoçarxda Şaxta baba, vətəndaşlar, uşaqlar, sənətçilər, idmançılar Suğra adlı qıza müraciət edərək ondan Əlinin onu çox sevməsini və onu bağışlamasını xahiş ediblər. Əlinin sevgilisinə müraciət edənlərin arasında Azərbaycandan karateçi Rafael Ağayev, müğənni Sevinc və Sevil bacıları, model Rüstəm Cəbrayılov və Sima Şərafətdinova, teleaparıcı Şəhriyar Əbilov, rejissor Kənan Məmmədov, hətta Türkiyədən olan sənətçilər də yer alıb.

Sevən gənc Milli.Az-a açıqlamasında deyib ki, əslində, o, bağışlanmayacaq elə də böyük günah sahibi deyil. Sadəcə, sevgilisinin kaprizi və üz döndərməsi ona əzab verir: "Onu 2 ilə yaxındır ki, sevirəm. Bir ay öncə aramızda inciklik yarandı. Bir ay öncəyə qədər o da məni sevirdi, amma indi sevib-sevmədiyini bilmirəm. Hərçənd etdiyim hərəkət bağışlanmayası səhv deyil. Ondan dəfələrlə üzr istəmişəm, bağışlanmağımı diləmişəm. Amma o susur. O vaxtdan bəri mənimlə görüşməyib. Ona görə mən də sevgimə digərlərinin dəstək olması üçün belə bir şey etmək ideyası ağlıma gəldi. Onun kaprizləri məni bunu etməyə məcbur elədi".
Əli hazırladığı videoçarxı artıq sevgilisi Suğraya göndəriyini, lakin ondan hələlik heç bir reaksiya gəlmədiyini deyib.

Maraqlıdır ki, Əli Suğra ilə aralarında yaranmış incikliyin səbəbini açıqlamaq istəməyib. (milli.az)

Ölkə.Az