Fərid Şahbazlı: “Uşaqları yalnız real həyatda deyil, rəqəmsal mühitdə də qorumalıyıq”
“Uşaqların sosial şəbəkələrə çıxışının yaş məhdudiyyəti ilə tənzimlənməsi məsələsinə qadağa kimi deyil, onların hüquqlarının və təhlükəsizliyinin qorunmasına yönəlmiş addım kimi yanaşmaq lazımdır”.
"Ölkə.az" xəbər verir ki, bu fikirləri “İslahatçı Gənclər” İctimai Birliyinin sədri, Editor.az İnformasiya Portalının baş redaktoru Fərid Şahbazlı bildirib.
QHT sədrinin sözlərinə görə, müasir dövrdə sosial şəbəkələr artıq sadəcə ünsiyyət vasitəsi deyil, insanların davranışlarına və düşüncə tərzinə təsir göstərən güclü mexanizmə çevrilib:
“Yetkin insanların belə təsirindən qorunmaqda çətinlik çəkdiyi alqoritmlərin qarşısında uşaqların tam müdafiəsiz qalması ciddi narahatlıq doğurur. Cəmiyyət olaraq uşaqların məktəbə getməsini, avtomobil idarə etməsini və əmək fəaliyyətinə başlamasını müəyyən yaş hədləri ilə tənzimləyiriksə, onların psixoloji inkişafına birbaşa təsir edən rəqəmsal mühitə girişinin də müəyyən qaydalar çərçivəsində tənzimlənməsi məntiqli görünür”.
Fərid Şahbazlı qeyd edib ki, sosial şəbəkələrin fəaliyyət modeli uşaqlar üçün əlavə risklər yaradır:
“Bu platformalar istifadəçinin diqqəti uğrunda mübarizə aparır. Onların biznes modeli insanların ekranda daha çox vaxt keçirməsinə əsaslanır. Uşaqlar isə bu sistemdə sadəcə istifadəçi deyil, onların davranışları, maraqları və reaksiyaları analiz olunan bir auditoriyaya çevrilirlər. Buna görə də uşaqları yalnız real həyatda deyil, onlayn məkanda da qorumalıyıq”.
Baş redaktor vurğulayıb ki, məqsəd texnologiyaya qarşı çıxmaq deyil, uşaqların rəqəmsal dünyaya hazırlıqlı şəkildə daxil olmasını təmin etməkdir:
“Texnologiyalar müasir həyatın ayrılmaz hissəsidir. Məqsəd uşaqları bu imkanlardan məhrum etmək deyil, onların texnologiyadan təhlükəsiz və şüurlu istifadə etməsinə şərait yaratmaqdır. Necə ki, məktəbdə dərs keçməzdən əvvəl əlifbanı öyrənmək lazımdır, eləcə də sosial şəbəkələrdən istifadə etməzdən əvvəl rəqəmsal savadlılıq və informasiya təhlükəsizliyi bacarıqları formalaşmalıdır”.
F.Şahbazlının fikrincə, uşaqların sosial şəbəkələrə çıxışının yaş məhdudiyyəti, valideyn nəzarəti və rəqəmsal savadlılıq proqramları ilə birlikdə tənzimlənməsi gələcək nəsillərin sağlam inkişafına xidmət edən mühüm preventiv addımdır:
“Güclü dövlət yalnız öz sərhədlərini deyil, həm də vətəndaşlarının, xüsusilə uşaqların psixoloji və mənəvi təhlükəsizliyini qorumağı bacaran dövlətdir. Bu gün rəqəmsal təhlükəsizlik məsələsi cəmiyyətin gələcəyi ilə birbaşa bağlı olan strateji məsələlərdən biridir”.
