Xaricdəki investisiya gəlirlərinə görə gömrük və bank sənədləri tələb olunmayacaq
Xaricdən əldə edilən investisiya gəlirlərinin repatriasiyası zamanı bəzi hallarda gömrük və bank sənədləri tələb olunmayacaq.
Ölkə.az xəbər verir ki, bu Milli Məclisin iqtisadi siyasət. Sənaye və sahibkarlıq komitəsinin bu gün keçirilən iclasında müzakirəyə çıxarılan "Valyuta tənzimi haqqında" Qanuna təklif edilən dəyişiklik layihəsində əksini tapıb.
Layihədə qeyd olunub ki, vençur kapitalı fondlarının, akkreditə olunmuş investorların xarici dövlətlərdəki innovativ layihələrdən (o cümlədən startaplardan) əldə etdikləri mənfəətin, dividendlərin və investisiyanın realizə edilməsi nəticəsində əldə olunan vəsaitlərin repatriasiyası və yenidən Azərbaycan Respublikasından göndərilməsi zamanı, vəsaitlərin əvvəllər Azərbaycandan göndərilməsini (Azərbaycan Respublikasına gətirilməsini) təsdiq edən gömrük bəyannaməsi və ya bank çıxarışı yalnız o halda tələb olunmur ki, ilkin investisiyanın qeyri-maddi aktiv və ya xidmət kimi qoyulduğu, yaxud əldə edilən gəlir xarici dövlətin səlahiyyətli vergi orqanının arayışı ilə təsdiq edilmiş olsun.
Həmçinin vurğulanır ki, rezidentlər tərəfindən Azərbaycandan kənarda fəaliyyət göstərən innovativ layihələrdə (startaplarda) gələcək iştirak payının əldə edilməsi (gələcək iştirak payı (səhm) haqqında müqavilə, konvertasiya olunan borc və analoji maliyyə alətləri) məqsədilə investisiyaların qoyulması üzrə köçürmələrə vençur kapitalı fondları tərəfindən məbləğ məhdudiyyəti tətbiq edilmədən, akkreditə olunmuş investorlar tərəfindən təqvim ili ərzində iki milyon ABŞ dolları ekvivalentindən çox olmamaqla yol verilir.
Qeyd edilən köçürmələr üzrə investor köçürmə tarixindən etibarən beş il ərzində müqavilədə göstərilən müddətdə iştirak payının (səhminin) əldə edilməsini təsdiq edən xarici reyestr çıxarışını müvəkkil banka təqdim etməyə və ya və investisiya cəlb edən şəxs müflis elan edildikdə və ya ləğv olunduqda xarici dövlətin səlahiyyətli qurumu tərəfindən bu halın təsdiqini göstərən sənədi təqdim etməyə borcludur.
Mürtəza
