“İdrak” liseyi o hadisəyə görə cərimələnibmiş...

Əmək və Əhalinin Sosial Müdafiəsi Nazirliyinin Dövlət Əmək Müfəttişliyi Xidməti “İdrak” liseyində Riyaziyyat müəllimi Şəhla Kərimovanın şagirdi tərəfindən güllələnməsini istehsalatda bətbəxt hadisə kimi qiymətləndirərək təhsil müəssisəsi barəsində protokol tərtib edib.

Ölkə.az-ın Xitab24.az-a istinadən məlumatına görə, protokolda qeyd olunub ki, “İdrak” liseyi istehsalatda baş verən bədbəxt hadisə faktını gizlədib və hadisənin araşdırılması məqsədilə qanunvericiliklə müəyyən edilmiş müddətdə müvafiq icra hakimiyyəti orqanına məlumat verməyib.

Buna görə də İnzibati Xətallar Məcələsinin 555.1-ci maddəsinə əsasən, lisey 1000 manat məbləğində cərimələnib.

“İdrak” liseyinin rəhbərliyi isə bu qərara etiraz edərək məhkəməyə üz tutub.

Şikayət ərizəsində qeyd olunub ki, DƏMX tərəfindən qərarın qəbulu zamanı ən fundamental hüquqi fərqləndirmə nəzərə alınmayıb. Belə ki, istehsalatda baş verən bədbəxt hadisə işçinin öz əmək funksiyasını icra edərkən qarşısıalınmaz texniki və ya təbii amillərin təsiri ilə zədələnməsidir. Lakin sözügedən hadisə üçüncü şəxsin birbaşa və qəsdən törətdiyi, mahiyyəti etibarilə cinayət xarakterli olan bir aktdır ki, bunun nə müəllimənin riyaziyyat tədrisi ilə, nə də müəssisənin istehsalat prosesi ilə uzaqdan-yaxından heç bir funksional bağlılığı yoxdur.

Binəqədi Rayon Məhkəməsi şikayəti əsaslı sayaraq təmin edib. Qərara əsasən, nazirliyin müvafiq qurumunun qərarı ləğv olunaraq, həmin iş üzrə icraata inzibati xəta tərkibi olmadığından xitam verilib.

Qeyd edək ki, məlum hadisəyə görə məktəbliyə Cinayət Məcəlləsinin 120.2.2-ci (xuliqanlıq niyyəti ilə adam öldürməyə cəhd) maddəsi ilə ittiham irəli sürülüb.