Nazirin məzun olduğu, alimlər yetişdirən 135 yaşlı məktəb

Ölkə.Az azvision.az-a istinadən xəbər verir ki, Prezident işğal dövründə ermənilər tərəfindən dağıdılan Tuğ kəndinin məktəbi önündə çıxış edərək deyib: "Ermənilərin dağıtdıqları Tuğ kəndinin məktəbi. Görün nə günə qoyublar. Sonra da deyirdilər ki, Tuğ kəndi erməni kəndidir. Erməni kəndi olsaydı, bunu dağıdardı? Bura qədim Azərbaycan torpağıdır. Tuğ kəndi həmişə Azərbaycan kəndi olub, bundan sonra da olacaq".

Qeyd edək ki, Tuğ məktəbi Azərbaycanın zəngin tarixə, mütərəqqi ənənələrə malik təhsil ocaqlarından biri olub. Əsası 1885-ci ildə Azərbaycanın görkəmli şairi Mir Mehdi Xəzani tərəfindən qoyulmuş məktəbdə Qori Müəllimlər Seminariyasını bitirmiş Mustafa Cahangirov, Mirzə Qara Məhərrəmov, Abdulla bəy Məlik Aslanbəyov, Məmməd bəy Məlikyeqanov, Kazan Universitetini bitirmiş Əsgər bəy Eyvazov kimi ziyalılar müəllimlik ediblər.

135 yaşlı Tuğ məktəbi ölkəyə yüzlərlə alim, dövlət məmuru, hərbçi, təhsil, mədəniyyət və incəsənət işçiləri bəxş edib. Məktəbin görkəmli məzunlarından biri Azərbaycan Xalq Cümhuriyyətinin dəmir yolu, poçt və teleqraf naziri, parlamentin üzvü olmuş, sonrakı illərdə ali məktəblərdə pedaqoji fəaliyyətlə məşğul olmuş texnika elmləri doktoru Xudadat bəy Məlikaslanovdur.

Kənd sakini Nizami Hüseynov ermənilər Dağlıq Qarabağ məsələsini qaldırdıqdan sonra vəziyyət pisləşməyə başladı. 1990-cı ildə bizdən 1 nəfər orta məktəb şagirdini öldürdülər. Bundan sonra vəziyyət daha da gərginləşdi. 1991-ci il oktyabr ayının sonlarında ermənilər evlərimizi yandırdılar. Bizi məcburi olaraq ayaqyalın, başıaçıq kənddən çıxardılar".

Tuğ sakini Vahid Göyüşovun da gənclik işləri bu kənddə keçib. O, görkəmli alimlər, ziyalılar yetişdirən Tuğ məktəbində təhsil alıb:

"8-ci sinfə qədər bu məktəbdə, 8-10-cu sinifləri başqa məktəbdə oxumuşuq. Məktəb 1978-ci ilə qədər köhnə binada fəaliyyət göstərib. Ulu öndər Heydər Əliyevin Sərəncamına əsasən 1975-1978-ci illərdə Tuğ kəndində müasir tipli yeni məktəb binası inşa edilib. Ermənilərlə eyni məktəbdə, amma ayrı-ayrı siniflərdə dərs keçirdik".

Məlumata görə, işğaldan əvvəl Tuğ kənd orta məktəbini yüzlərlə azərbaycanlı bitirib. Məktəbin məzunları arasında 18 nəfər elmlər doktoru, 21 nəfər elmlər namizədi, 40 nəfərə yaxın yüksək rütbəli hərbi mütəxəssis, həkimlər, müəllimlər və digər ixtisas sahibləri də var. Münaqişə dövründə məktəbin 8 məzunu şəhidlik zirvəsinə ucalıb.

Qeyd edək ki, 1991-ci il oktyabrın 30-da Tuğ kəndi işğal ediləndən sonra məktəbin binası ermənilər tərəfindən dağıdılaraq yararsız hala salınıb. 29 il işğal altında qalan Tuğ kəndi 2020-ci il noyabrın 9-da Müzəffər Azərbaycan Ordusu tərəfindən azad olunub.