Azərbaycanda onlayn alış artıb

2014-cü ilin yanvar-noyabr aylarında istehlak məqsədilə pərakəndə ticarət subyektlərində istehlakçılara 19,2 milyard manatlıq və ya 2013-cü ilin müvafiq dövrü ilə müqayisədə 9,5 faiz çox əmtəə satılıb.

Dövlət Gömrük Komitəsindən bazar ertəsi verilən məlumata görə, satılmış istehlak mallarının 50,1 faizini ərzaq məhsulları, içkilər və tütün məmulatları, 49,9 faizini qeyri-ərzaq malları təşkil edib və qeyri-ərzaq mallarının xüsusi çəkisi əvvəlki ilin eyni dövrü ilə müqayisədə 3,3 faiz bəndi artıb.

Cari ilin on bir ayında elektron pərakəndə ticarət dövriyyəsinin həcmi ötən ilin yanvar-noyabr aylarına nisbətən 2,4 dəfə artaraq 5,6 milyon manat təşkil edib. Əhali onlayn rejimdə sifariş verdikləri istehlak mallarının 91,2 faizini hüquqi şəxslərin, 8,8 faizini fərdi sahibkarların ticarət şəbəkələrindən alıb. Elektron ticarət dövriyyəsinin 94,7 faizini qeyri-ərzaq malları təşkil edib.(Trend)

Ölkə.az