Tibb Universitetinin professoru məhkəmə qarşısında

 “Ölkə.Az”ın xəbərinə görə, Vasilyeva Alina Yakovlevna həyat yoldaşını əməliyyat edən Azərbaycan Tibb Universiteti Tədris Cərrahiyə Klinikasının cərrahi xəstəliklər kafedrasının müdiri Bayramov Nuru Yusif oğlunu məhkəməyə verib. 

Qadın professordan ərinin ölümünə görə maddi və mənəvi ziyan tələb edir. Belə ki, 2016-cı ilin sentyabr ayında Nuru Bayramov qadının həyat yoldaşını mədə xərçəngi diaqnozu ilə əməliyyat edib. Ancaq 10 gündən sonra kişi vəfat edib. Bundan sonra qadın Nəsimi rayon prokurorluğuna həkim səhlənkarlığına görə şikayət edib. 

Prokurorluqda professorun əməliyyat zamanı səhlənkarlıq edib-etmədiyi araşdırılıb və belə qənaətə gəlinib ki, əməliyyat zamanı həkimin heç bir səhvi olmayıb. Prokurorluğun qərarından narazı qalan qadın mülki qayda da rayon məhkəməsinə müraciət edib və maddi, mənəvi ziyanın ödənilməsi ilə bağlı iddia qaldırıb. Məhkəmə prosesinə Nəsimi rayon məhkəməsinin hakimi Natəvan Tağıyevanın sədrliyi ilə baxılacaq. 

Baş vermiş hadisə ilə bağlı kafedra müdiri Nuru Bayramovun mövqeyini öyrəndik. O, faktı təsdiq edərək bildirdi ki, həqiqətən belə əməliyyat edib: “Ancaq kişinin ölməyini gözləmirdim”.