Evli qadını şantaj edib pul qoparan şəxs cəzadan narazıdır

Evli qadından hədə-qorxu ilə pul tələb etməkdə təqsirləndirilən şəxs Ali Məhkəməyə müraciət edib.

“Ölkə.Az”ın məlumatına görə, cinayət məcəlləsinin 182.2.2-ci maddəsi ilə məhkum olunan Roland Abdıyevin məhkəmə prosesinə hakim Hafiz Nəsibov sədrlik edəcək. Cinayət işində zərərçəkmiş qismində İslamova Aytən Rəhman qızı tanınıb.

Xatırladaq ki, 2016-cı ilin iyun ayında Bakı Ağır Cinayətlər Məhkəməsində hakim Cavid Hüseynovun sədrliyi ilə keçirilən prosesdə Roland Abdıyev 7 il müddətinə azadlıqdan məhrum edilib.

Qeyd edək ki, Roland Abdıyev internetdə tanış olduğu qadınla yaxın münasibətdə olduqdan sonra əlindəki özəl görüntüləri onu şantaj edib. Bildirib ki, bu fotoları ərinə verəcək və internetdə yayacaq. Baş Mütəşəkkil Cinayətkarlıqla Mübarizə İdarəsi əməkdaşlarının həyata keçirdikləri əməliyyat-axtarış tədbirləri nəticəsində noyabrın 6-da Abşeron rayon sakini A.İ-ni (qadın) rüsvay edəcəyi ilə hədələyib ondan 100 manat alarkən Ağstafa rayon sakini Roland Abdiyev tutulub.