Sığorta göndərişi ilə gedən xəstədən hansı halda pul tələb olunur? - AÇIQLAMA

Bəs, görəsən, vətəndaş belə hallarla qarşılaşarsa, nə etməlidir? Belə hallarda nə tədbir görülür?

Məsələ ilə bağlı İcbari Tibbi Sığorta üzrə Dövlət Agentliyindən “Ölkə.az”ın sorğusuna cavab verilib. Bildirilib ki, vətəndaş göstərilmiş tibbi xidmətlərin keyfiyyətindən narazıdırsa və ya tibb personalı tərəfindən ona qarşı hüquq pozuntusuna yol verilibsə bununla əlaqədar ilk növbədə “Vətəndaş müraciətlərinə baxılması və vətəndaş qəbulunun təşkili haqqında” Agentliyin Əmrinə əsasən tibb müəssisəsinin vətəndaş müraciətləri ilə bağlı təyin olunmuş məsul şəxslərinə və yaxud birbaşa rəhbərliyinə müraciət etməlidir:

“Vətəndaş ona verilmiş cavabdan və yaxud görülmüş tədbirdən razı qalmazsa TƏBİB-in 012 310 17 70 nömrəsinə zəng edə, [email protected] elektron poçt ünvanına və ya rəsmi ünvanına (İsmayıl Hidayətzadə küç. 11, Bakı, AZ1154) müraciət edə bilər.

Qanunvericiliyə əsasən, vətəndaş tərəfindən neqativ hal ilə bağlı əsaslandırılmış sübut təqdim edildiyi təqdirdə fakt müvafiq qaydada araşdırılır. Təsdiqini tapmış fakta dair hüquq-mühafizə orqanlarına müraciət edilir. Tibb işçisinin hüquq pozuntusuna yol verdiyi sübut olunarsa, o qanunvericiliklə nəzərdə tutulmuş qaydada məsuliyyətə cəlb olunur”.

Agentlikdən “Ölkə.az”a verilən açıqlamada həmçinin qeyd olunub ki, Xidmətlər Zərfinə daxil olan tibbi xidmətlərə gəldikdə isə icbari tibbi sığorta çərçivəsində 2550 sayda tibbi xidmətə təminat verilir:

“Xidmətlər Zərfinə aşağıdakı tibbi xidmətlər daxildir:
• ilkin səhiyyə xidməti 
• təcili və təxirəsalınmaz tibbi yardım xidməti
• ixtisaslaşdırılmış ambulator yardım xidməti 
• laboratoriya xidməti 
• fizioterapiya xidməti 
• invaziv radiologiya xidməti 
• stasionar tibbi xidmət

Laboratoriya xidmətlərinə kliniki analizlər, biokimyəvi analizlər, bakterioloji analizlər, immunoloji analizlər, infeksiyaların təyini və digər xidmətlər daxildir. TSH və insulin analizləri də laboratoriya xidmətlərinə daxildir və tibbi göstəriş olduqda Xidmətlər Zərfi çərçivəsində qarşılanır. 

Nəzərinizə çatdırırıq ki, icbari tibbi sığortanın Xidmətlər Zərfi çərçivəsində vətəndaşlara tibbi xidmətlər Tibbi Ərazi Bölmələrini İdarəetmə Birliyinin (TƏBİB) tabeliyində olan dövlət tibb müəssisələrində göstərilir. TƏBİB-in tabeliyində olan dövlət tibb müəssisələrində müvafiq xidmətin göstərilməsi mümkün olmadığı təqdirdə vətəndaşa müqaviləli tibb müəssisəsinə göndəriş verilir.

Vətəndaş TƏBİB-in tabeliyindəki dövlət tibb müəssisəsi tərəfindən ona verilən göndəriş vərəqəsi əsasında müqaviləli tibb müəssisəsinə müraciət etdikdə Xidmətlər Zərfinə daxil olan tibbi xidmətlərdən ödənişsiz şəkildə yararlanır. Bu halda müvafiq tibbi xidmətin dəyəri müqaviləli tibb müəssisəsinə İcbari Tibbi Sığorta üzrə Dövlət Agentliyi tərəfindən ödənilir”.
Agentlikdən verilən məlumatda vurğulanır ki, vətəndaş göndəriş vərəqəsi olmadan birbaşa müqaviləli tibb müəssisəsinə müraciət edərsə, tibbi xidmətin dəyərini tam həcmdə öz vəsaiti hesabına ödəməlidir.

Müqaviləli tibb müəssisələrinin sayı mütəmadi olaraq yenilənir. Müqaviləli tibb müəssisələrinin siyahısı ilə buradan tanış ola bilərsiniz.

İTS-dən göndərişlə gedən xəstədən hansı halda pul tələb olunması ilə bağlı suala isə belə cavab verilib:

“Vətəndaş TƏBİB-in tabeliyindəki dövlət tibb müəssisəsi tərəfindən ona verilən göndəriş vərəqəsi əsasında müqaviləli tibb müəssisəsinə müraciət etdikdə Xidmətlər Zərfinə daxil olan tibbi xidmətlərdən ödənişsiz şəkildə yararlanır. Bu halda müvafiq tibbi xidmətin dəyəri müqaviləli tibb müəssisəsinə İcbari Tibbi Sığorta üzrə Dövlət Agentliyi tərəfindən ödənilir.

Müqaviləli tibb müəssisələrinə verilən göndərişdə qeyd olunan diaqnoz və xidmətdən kənar əlavə müayinələrə ehtiyac yaranarsa, sözügedən tibb müəssisəsində həmin müayinələri vətəndaş öz vəsaiti hesabına ödəməlidir. Həmin müayinələr Xidmətlər Zərfi ilə təminata alınıbsa, vətəndaş TƏBİB-in tabeliyindəki dövlət tibb müəssisəsində ödənişsiz yararlana bilər”.

Billurə Yunus