Transxəzər Təbii Qaz Kəmərinin tikintisi çox tez həyata keçirilə bilər - Açıqlama

"Ölkə.Az" xəbər verir ki, bunu Türkiyə Palatalar və Birjalar Birliyinin (TOBB), Türk Ticarət və Sənaye Palatasının sədri Mustafa Rifat Hisarcıklıoğlu deyib. O bildirib ki, Transxəzər Təbii Qaz Boru Kəməri hər zaman gündəmdə olan çox əhəmiyyətli enerji layihəsidir:

"Yaxın keçmişdə əlimizə düşən bəzi imkanları dəyərləndirməmişik. Bununla belə, hazırkı şəraitdə, xüsusən Qərbdə enerji böhranı yaşandığı üçün Transxəzər Təbii Qaz Kəmərinin tikintisi çox tez həyata keçirilə bilər. Türkmənistan təbii qazının Xəzər dənizindən keçməkdə Azərbaycanda Trans-Anadolu Qaz Boru Kəmərinə ötürülməsi həyati əhəmiyyət kəsb edir".

M. R. Hisarcıklıoğlunun sözlərinə görə, Türkmənistan keyfiyyətli qaz yataqlarına malikdir, qaz ehtiyatlarına görə dünyada 4-cü yerdədir. Ölkənin Şərqində kəşf edilmiş qaz da Qərb xəttinə, yəni Xəzər dənizinə gətirilə bilər: "Biz son illərdə Azərbaycan-Türkmənistan münasibətlərindəki yaxınlaşmaya, Xəzərdəki bəzi enerji yataqları ilə bağlı problemin həll edilməsinə görə çox məmnunuq".