"Bakıda bu binalar 7 baldan yuxarı zəlzələyə davamlı deyil" - AÇIQLAMA
Qonşu Türkiyədə təbii fəlakət nəticəsində dağılmış binalar Azərbaycanda çoxmənzilli binalarda yaşayanlarda da narahatlıq yaradıb. Belə ki, son hadisələr ölkəmizdə binaların dayanıqlıq məsələsini gündəmə gətirib.
Əmlak sahəsi üzrə ekspert Ramil Osmanlı “Ölkə.Az”a açıqlamasında bildirib ki, Azərbaycanda çoxmənzilli binaların keyfiyyəti normaldır:
“Tikinti standartları bir çox məqamlarda pozulsa da, keyfiyyətlə bağlı məqamlarda belə problem görmürəm. Bizim narahatlığımız sovet dövründən qalmış, ötən əsrin əvvəlləri və ortalarında tikilmiş beton-panel konstruksiyalı binalarla bağlıdır. Bu binalar Tükiyədə baş vermiş 7 baldan yuxarı zəlzələyə təbii ki, davamlı deyillər”.
Ekspertin sözlərinə görə, yeni tikililər kifayət qədər davamlıdır, lakin narahatlıq onların yerləşməsi ilə bağlıdır:
“Yaşayış binaları bir-birlərinə həddən artıq yaxın tikilib. Bu tikililər infrastruktur obyektlərinin mühafizə zolaqlarının üzərində, yaxınlığında yerləşir. Bu isə hər hansı bir seysmik hadisə zamanı insanların evakuasiyası imkanlarını məhdudlaşdırır.
Şəhərdaxili əsas yolların hər birinin kənarında çoxmərtəbəli binalar var. Bu binalar bir-birlərinə o qədər yaxın inşa olunub ki, zəlzələ baş verdiyi halda binalar yolun hərəkət hissəsini bağlayacaq və nəqliyyatın hərəkətinə ciddi problem yaradacaq. Onsuz da Bakı şəhərində nəqliyyat infrastrukturu olduqca problemlidir. Həmçinin binalar nəqliyyat vasitələrinin üzərinə uça bilər”.
R. Osmanlı problemlərin bina tikintisindəki keyfiyyətlə bağlı olmadığını, tikilən binaların böyük ölçüdə keyfiyyətli binalardan ibarət olduğunu vurğulayıb.
Könül
Ölkə.Az
