Canavarı boğaraq öldürən 60 yaşlı şəxs danışdı: "Mənə hücum etdi, əlimlə boğdum" - FOTO
Qaxda 60 yaşlı kişi canavarı boğaraq öldürüb.
Axşam saatlarında Qax rayonunun Ləkit kəndində canavar kənd sakinləri, 74 yaşlı Qəhrəman Rəhimov və 60 yaşlı Hacı Hacıyevə hücum edərək onlara xəsarət yetirib. Canavarın hücumu zamanı xəsarət alan Hacı Hacıyev canavarı boğaraq öldürə bilib.
Canavarı boğaraq öldürən 60 yaşlı kənd sakini Hacı Hacıyev Referans.az-a danışıb.
“Axşam hava qaralan vaxtda dayanacağın yanında qonşularla söhbət edirdim. Birdən nəsə dişlədi, elə bildim itdir. Çevrilib baxanda gördüm canavardır. Yapışdım boğazından yerə yıxdım və dişləməsin deyə boynundan tutdum. Yanımda 5-6 nəfər var idi, onlar da kömək etdilər. Canavarı boğaraq öldürdüm. Sonra baytarlıqdan gəlib incələdilər. Mənə 3 dənə dişi batıb, qalın paltar geyinmişdim. Daha sonra isə iynə vuruldu, peyvənd edildim, daha bir iynə də vurulacaq.”
Canavarı boğaraq öldürən Hacı Hacıyev səhhətinin yaxşı olduğunu və müalicə aldığını bildirib.
