“Azərişıq” liftlərə sayğac quraşdırır?

“Ölkə.Az” xəbər verir ki, bununla bağlı iddialar sosial şəbəkələrdə səsləndirilib. 

Məlumatlarda bəzi binalarda liftlərdə sadə, bəzilərində isə smart tipli sayğac qoyulduğu, bunun da sakinlər arasında narazılıq yaratdığı bildirilir.

Sayğacların tətbiqinə etiraz edən sakinlərin sözlərinə görə, smart sayğacla əvvəlcədən ödənişdə çətinlik yarana bilər və liftlərin işi dayanar. Yaxud smart sayğaca yüklənən məbləğ gözlənilmədən bitər, liftdən istifadə edən şəxs hər an, o cümlədən gecə saatlarında liftdə qala bilər. 

Belə bir vəziyyətlə Binəqədi rayonu 9-cu mikrorayon, Adil Məmmədov küçəsi, 83 saylı binanın sakinlərinin üzləşdiyi deyilir. 

Həmçinin, smart tipli 1 ədəd sayğaca görə sakinlərdən 475 manat ödəniş istənildiyi iddia edilir. Qeyd edilir ki, lift üçün sayğaclar yalnız kooperativ yaşayış binalarında tətbiq edilir, “JEK” binalarında quraşdırılmır. Bunu isə vətəndaşlar ayrı-seçkilik, yaxud istehlakçı hüquqlarının pozulması kimi dəyərləndirirlər.

Əmlak sahəsi üzrə ekspert Ramil Osmanlı “Ölkə.Az”a açıqlamasında bildirdi ki, liftə ayrıca sayğacın qurulması doğru deyil:

“Binalara ümumi sayğaclar qoyulur ki, bu da mənzillərdən kənar olan elektrik qurğuları və işıqlandırma sistemlərinin sərfiyyatını dəqiqləşdirilməsi üçündür. Bu da artıq qeyri-əhali sayılır. Sözügedən sayğaclar adətən smart tipli deyil, mexaniki sayğaclar olur və hər ayın sonunda ödənişlə bağlı sənəd göndərilir və ödəniş edilir”. 

Ekspert əlavə edib ki, liftə bu cür sayğacın qoyulması yolverilməzdir və qeyri-qanunidir. 

“Ölkə.Az” məsələ ilə bağlı “Azərişıq” ASC-yə sorğu ünvanlayıb.