Təhsildən uzaq, cahil insanlar işimə əngəl olur

Ölkə.Az xəbər verir ki, təhsil üzrə Prezident təqaüdçüsü, filologiya üzrə fəlsəfə doktoru, "Maarifçi Qadınlar" İctimai Birliyinin sədri, İstanbulda fəaliyyət göstərən Hüseynin Cavid adına məktəbin direktoru Şərqiyyə Məmmədovanın təşkilatçılığı ilə baş tutan tədbirdə bu sahədə mövcud olan problemlərdən danışılıb.

45 il Azərbaycan təhsilində fasiləsiz olaraq çalışan Ş.Məmmədova artıq 7 ildir ki, Türkiyədə yaşayan azərbaycanlıların da təhsilə cəlb edilməsində fəal iştirak edir:

"İllər uzunu qazandığım təcrübəni həm İstanbulda çalışan müəllimlərimizlə bölüşürəm, həm də uşaqlarımıza təhsil veririk.

Azərbaycanda olanda cənub bölgələrimizdə - Masallıda, Cəlilabadda proyektlər həyata keçirirdim. Gedib harada oxumayan uşaqlar varsa, onların anaları ilə söhbətləşir və onların təhsilə cəlb edilməsi üçün işlər aparırdıq. Fərq etdim ki, Türkiyədə də təhsildən yayınan azərbaycanlı uşaqlar var. Orada da öz fəaliyyətimi qurdum, uşaqları təhsilə cəlb elədim.
7-ci ildir ki, bu layihələri Türkiyədə dövlət dəstəyi ilə həyata keçirirəm. Müəyyən bölgələrdəki uşaqları axtarırıq, tapırıq, təhsilə cəlb edirik.

Hətta İstanbulda 2 yerdə məktəbimiz fəaliyyət göstərir. Küçük Çekmece bölgəsində 100 nəfərə yaxın uşağımız təhsil alır. Digər məktəbimizdə isə 600-ə yaxın uşaq təhsil alır".

Ş.Məmmədova Türkiyədəki fəaliyyətində ona müəyyən maneələr yaradıldığını söyləyib:
"Təəssüf ki, orada təhsildən uzaq, cahil, təhsildən anlamayan bəzi insanlar var ki, mənim işimə əngəl olur, şikayət yazır, gəlib yanımda məktəb açır, Mübariz Mənsimovun dəstəyi ilə işimə əngəl törədirlər. Daha yüksək məbləğlər vəd etməklə, müəllimləri məktəbdən uzaqlaşdırırlar. Ora Azərbaycan deyil, müəllim tapmaq çətindir.

Bizimkilərdən fərqli olaraq Türklər fəaliyyətimi çox yaxşı qarşılayır. Orada təhsil adı gələndə onlar əlini daşın altına qoyur. Onların dəstəyi sayəsində illərdir ki, fəaliyyətimi davam etdirə bilirəm".

Ş.Məmmədova Türkiyədəki azərbaycanlı uşaqların təhsilini davam etdirməsi üçün Azərbaycanın dövlət qurumlarının dəstəyinin az olmasından narazılığını ifadə edib:
"Bu il bizim 9-cu sinifdən olan 9 nəfər şagirdimiz var. Türkiyədə azərbaycanlılar üçün mərkəzləşmiş qaydada imtahan təşkil olunmadığından Azərbaycana gələrək şəhadətnamə imtahanı verməyi tövsiyə etdim.

Mövcud problemlərlə bağlı Elm və Təhsil Nazirliyinə müraciət etsəm də, cavab gəlməyib.
Azərbaycandan mənə yalnız dərsliklər verilir.
Əlimdən gələni edəcəyəm, olmasa başqa variantım var. Bu uşaqları etibarsız əllərə əmanət etməyəcəyəm", - deyə o əlavə edib.

Direktor, Azərbaycanda daha yüksək instansiyalara müraciət edəcəyini söyləyib.
Tədbirdə iştirak edən kütləvi informasiya vasitələri nümayəndələri və digər qonaqlar mövzu ətrafında fikir mübadiləsi aparıb, Azərbaycandakı müvafiq dövlət qurumlarının dəstəyinin vacibliyi vurğulanıb.

Billurə

Ölkə.az