Onlara cinayət işi açılmalıdır, üstünü örtməyə çalışırlarxa0- Deputat

Bu sözləri Ölkə.Az-a açıqlamasında Milli Məclisin Ailə, qadın və uşaq məsələləri komitəsinin sədri Hicran Hüseynova 13 yaşlı qızın 37 yaşlı dul kişi ilə nişanlanması barədə danışarkən deyib.

Azyaşlı qızların da qnaunvericiliklə qorunan hüquqları olduğunu xatırladan millət vəkili bildirib ki, onun zorla nişanlanmağa məcbur edilməsi hüquqlarının pozulmasıdır:

"Bu cür davranışlar əslində, qız uşaqlarına qarşı zorakılıq halıdır. O qızın hüquqları var və pozulub. Belə şeylər olanda aidiyyəti qurumlar bu məsələlərə çox diqqətlə yanaşmalıdırlar. Adətən, "ailə məsələsidir" deyib çox da şişirtmək istəmirlər, hadisələrin üstünü örtməyə çalışırlar. Amma mən düşünürəm ki, belə məsələlər olanda bu addımı atanlar cəzalandırılmalıdır ki, bir də təkrar olunmasın, çoxlarına nümunə olsun.

Hər bir məsələdə üstünlük Azərbaycan qanunlarında olmalıdır. Qanunda yazılıb ki, qız uşağı 18 yaşında ailə qura bilər. Ondan əvvəl kimsə bu məsələlərdə hansısa bir hərəkət edirsə, qızı məcburi formada evləndirməyə və ya nişanlamağa cəhd edirsə, ona mütləq cinayət işi açılmalıdır", - deyə o əlavə edib.

Qeyd edək ki, paytaxtın Sabunçu rayonu ərazisində 13 yaşlı qız anasının boşanmış 37 yaşlı dayısı oğluna nişanlanmışdı.

Ailə, Qadın və Uşaq Problemləri üzrə Dövlət Komitəsinin nişanın pozulduğunu, Daxili İşlər Nazirliyi ailədən izahatlar alındığını, Sosial Xidmətlər Agentliyindən isə 13 yaşlı qızın azyaşlı bacısı ilə birlikdə sosial xidmət müəssisəsinə yerləşdirildiyini açıqlayıb.

Billurə Yunus