Bakıda icarəyə avtomobil tapılmır - AÇIQLAMA

Avtomobil bazarı üzrə ekspert Eyyub Əliyev “Ölkə.Az”a açıqlamasında bildirdi ki, yay aylarında, xüsusən də bayram günlərində icarə almaq üçün avtomobil tapmaq çətin olur:

“Bunun əsas səbəblərindən biri turizmdir. Çünki yay aylarında ölkəyə çoxlu sayda turistlər gəlir və kirayə avtomobillərdən istifadə edirlər. 

Həmçinin bayram günlərində regionlara gedən vətəndaşlarımız “rent a car”lara üz tuturlar. Məsələn, Gəncəyə yola düşən üç nəfərlik ailəyə taksi ilə adambaşı 20-25 manata getməkdənsə, 70-80 manatlıq icarəyə avtomobil götürmək daha çox sərfəli görünür. Çünki geri dönüşdə də həmin nəqliyyat vasitəsindən istifadə edirlər. Paytaxtda yaşayanların böyük hissəsinin rayonlardan gəldiyini nəzərə alsaq, onlar üçün icarəyə nəqliyyat vasitəsindən istifadə daha əlverişlidir”.

Ekspertin sözlərinə görə, bəzi hallarda isə vətəndaşlar öz avtomobillərini uzaq yola çıxarkən istifadə etmək istəmirlər: “Həmin vaxtlarda icarə avtomobil köməyə çatır. Bu hallar çox olmasa da, mövcuddur”. 

“Bu günlərdə isə “rent a car”larda avtomobillərin tapılmamasının səbəbi yay ayları ilə bağlı olaraq turizm, istirahət günləri ilə bağlı regionlara üz tutmadır”, - deyə E. Əliyev əlavə edib.

Könül
Ölkə.Az