2025-ci ildə devalvasiya olacaq? - AÇIQLAMA
“Ölkə.Az” xəbər verir ki, iqtisadçı ekspert Natiq Cəfərli rublun ucuzlaşmasının iqtisadi təsirlərini şərh edib. O bildirib ki, Rusiyada qiymətlər birbaşa məzənnədən asılıdır:
“Rusiya Dumasının maliyyə bazarları komitəsinin sədri deputat Aksakov deyir ki, Rusiya əhalisi dollar-avronun məzənnəsi ilə maraqlanmır. Aksakovun sözlərinə görə məzənnə əhalinin 99%-nə təsir etmir. Onlar xaricə getmir, ona görə də, dolların 101 rubl olmasını əhali gülümsəyərək qarşılayır.
Lakin Rusiyada qiymətlər birbaşa məzənnədən asılıdır. Rublun son aylar 30-35% dəyər itirməsi inflyasiyanı sürətləndirib və qiymətlər günbəgün artır. Xaricə getməyən orta statistik rusiyalı dükan-bazara da getmir?!”
Rubl və lirə kimi qonşu valyutalar dəyərdən düşən zaman manatın taleyi də aktuallaşır.
Ekspert isə manatın məzənnəsindən danışarkən bildirib ki, Azərbaycanda məzənnə inzibatidir və 1,7 səviyyəsində saxlanılır: “Manatla bağlı proseslər 2025-ci ildən başlayacaq. 2025-ci ildə yenə 2-3 pilləli devalvasiyaya gedib 10 il sabit məzənnə rejiminə keçiləcək”.
Ekspert istənilən halda devalvasiyaya gediləcəyini deyir: “Manatın alıcılıq qabiliyyəti sürətlə ölür - əslində bu, devalvasiyadan heç də az təhlükəli deyil”.
Könül
Ölkə.Az
