“Türkiyə iqtisadiyyatı çökə bilərdi” - ŞƏRH

“Ölkə.Az” xəbər verir ki, bunu iqtisadçı ekspert Elman Sadıqov deyib. O bildirib ki, Türkiyə monetar siyasətində çox böyük və dərin səhvlərə yol verib:

“Ucuz türk lirəsi niyyəti və strategiyası doğru idi, həmin strategiyanı həyata keçirmək üçün seçilən taktika, gedilən yol tamamilə yanlış oldu. Həmin səhvlərin (məsələn, kur korumalı mevduat - kurs fərqindən qoruyan depozit) bir hissəsinin nəticələrini bu gün də aradan qaldırmaq böyük baş ağrısıdır və büdcə bunun bədəlini hələ də ciddi xərclərlə ödəyir. Əslində Türkiyə iqtisadiyyatı defolt ola, çökə bilərdi və bu ehtimal çox yüksək idi. Bu iqtisadiyyat möcüzə sayəsində çökmədi. Bu möcüzə Türkiyənin istihdamı qorumaq cəhdləri, bu yolda atdıqları addımlar oldu (kənar dəstəklər, ölkəyə girən valyuta, enerji sahəsindəki məsələlərin də rolu oldu. Lakin, bu rol məşğulluğun, xidmət və yerli istehsalın qorunmasının gətirdiyi bəhrə qədər önəmli və güclü deyil). Türkiyə monetar siyasətdə buraxdığı səhvləri məşğulluq sahəsində də buraxsaydı, 99,9% ehtimalla defolt ola, dərin, xroniki böhrana sürüklənə bilərdi. Məsələn, Argentina kimi”. 

Ekspert bildirir ki, məşğulluq iqtisadiyyatın təkcə ən dərin, ən böyük sahələrindən biri deyil, onun nüvəsi, drayveridir:

“Onlarla, yüzlərlə deyil, hətta bircə nəfər işləyən şəxsin belə işsiz qalması iqtisadiyyata nə qədər zərər verir, dövriyyəyə nə qədər mənfi təsir edir, biznes mühitini boğur”, - deyə E. Sadıqov əlavə edib.

Könül
Ölkə.Az