Füzulidə yeni çəkilən yol niyə tənqid olundu? - AÇIQLAMA (FOTOLAR)
“Ölkə.Az” xəbər verir ki, bunu Nəqliyyat sahəsi üzrə ekspert, “İnsan yönümlü şəhərlər” səhifəsinin rəhbəri Anar Əliyev deyib. O bildirib ki, işğaldan azad olunan regionlarımızda hətta sıfırdan salınan şəhərlərdə yenə də küçə layihələndirmə məsələlərində müasir yanaşma tətbiq edilmir:
“Görünür ki, yenə də yeganə önəmli prinsip “əsas geniş yol olsun”dur. Bəli, burada velosiped yolu və geniş səkilər nəzərdə tutulub, bu, yaxşı haldır, lakin yolun bir tərəfindən digər tərəfinə keçmək çox təhlülkəli və narahat görünür”.
Ekspert küçə ilə bağlı mövcud olan problemlərin bir qismini sadalayıb: “Piyada keçidlərinin sayı kifayət qədər deyil, onlar hər yolayrıcında olmalıdır, burada isə bu uzunluqda cəmi 2 ədəd görünür. 4 zolaqlı yolların kəsişməsində mütləq svetoforlar qoyulmalıdır.
Piyada keçidləri əgər nizamlanan deyilsə, mütləq təhlükəsizlik adacıqları olmalıdır. Parklanma yerləri sadəcə boya ilə işarələnib, onların Ağ Şəhərdəki kimi səki çıxıntısı ilə olması daha məsləhətdir. Velosiped yolları səkilərdə var, amma velosiped yolunun keçidləri yoxdur, nə yolayrıcıda, nə də piyada keçidlərinin yanında”.
⠀
A. Əliyev müqayisə üçün İsveçin paytaxtını nümunə göstərib.
“Burada söhbət gözəllikdən deyil, təhlükəsizlikdən gedir. Bu gün İsveçin əhalisi Azərbaycan ilə demək olar ki eyni olsa da, onlarda qəzalarda qat-qat bizdən az insan ölür. Çünki İsveçdə infrastruktur özü təhlükəsizdir. Ümid edirəm, nə qədər ki gec deyil, yenidən salınan bütün şəhərlərdə yanaşma dəyişəcək”, - deyə ekspert əlavə edib.
Könül
Ölkə.Az
